هه‌ولێر مه‌رج ئه‌را وازكردن شوونه‌يل گه‌شتيارى ديرێد
شه‌فه‌ق نيوز/ ده‌سه‌ى گه‌شتيارى له هه‌رێم كوردستان، بڕيار دا سوو په‌نجشه‌ممه دوباره ناوچه و شوونه‌يل گشتيارى له پاريزگاى هه‌ولێر واز بكا.
له‌ى باوه‌ته‌و، نادر رۆستى قسه‌كه‌ر وه‌ناو ده‌سه‌ى گه‌شتيارى له لێدونيگ ئه‌را ئاژانس شه‌فه‌ق نيوز وت: شانه‌ى قه‌يران له حكومه‌ت هه‌رێم كوردستان رێ وه پاريزگاره‌يل داگه بڕيار بيه‌ن له باره‌ى دوباره وازكردن شوونه‌يل داخرياێ وه‌بوونه‌ى ڤايرۆس كۆرۆنا، باس له‌وه‌يش كرد پاريزگاگه بريار داگه ناوچه‌يل گه‌شتيارى له شاره‌گه واز بكا.
له هه‌مان مه‌سه‌له، وه‌ڕيه‌وبه‌رايه‌تى گه‌شتيارى له هه‌ولێر زنجيره رينمايه‌يليگ ئه‌را جيوه‌جيكردنى ده‌ركردگه له ناوچه‌يل گه‌شتيارى جوور رێ وشوون خواست ئه‌را خوه‌يپاريزى له ڤايرۆس كۆرۆنا وه‌ى جووره: قيليانكيشان رێ وه‌پى نادريه‌ێد، ئاهه‌نسازى وه‌جه‌م رێ وه‌پى نادريه‌ێد، شماره‌ى كورسيه‌يل ده‌ورگرد مێز له چوار دانه زياتر نه‌دێ و هه‌ر مێزيگ 3 مه‌تر له‌واكه‌ى تر دوير بدێ وه‌ل وه‌كارهاوردن كه‌ره‌سه‌يل يه‌كجار مه‌سره‌ف و پووشانن مێزه‌گه وه ماده‌ى نايلۆن و ئاڵشتكردنى وه وه‌رده‌وام.
جى باسه، وه‌ل ئه‌وه‌يشا بايه‌سه قاپى و ده‌روه‌چه‌يل له شوونه‌يل گه‌شتيارى واز بكريه‌ێد وه‌شيوه‌يگ وه‌رده‌وام وه‌ل زيايكردن شماره‌ى هه‌واكيش و وه‌كارخستنى وه‌شيوه‌يگ وه‌رده‌وام و پاككردنه‌وه‌ى رووژانه‌و پووشانن ماسك و ده‌سكيش وه وه‌رده‌وام و پاككردنه‌وه‌ى پله‌كانه‌يل كاره‌بايى له ناوه‌نده‌يل گه‌شتيارى و وه‌كارهاوردن باخچه‌يل ئه‌را دانيشتن ميوانه‌يل و وازكردن شوونه‌يليش تا سه‌عات يه‌ك دوياى نيمه‌ى شه‌و بدێ و وه‌كارهاوردن سيسته‌م Valet Parking Service له گه‌راج سه‌ياره‌يل.
