نێچیرڤان بارزانی: هیز لەبان سنوور دانایمن و رۆڵ لە ناوبژیوانی لە ناوەین ئیران و ئەمریکا رانیمنە
شەفەق نیوز - هەولێر
نێچیرڤان بارزانی، سەرۆک هەرێم کوردستان، ئمڕوو دووشەممە، ئاشکرا کرد کە دەسەڵاتەیل لە هەرێم هیزەیلیگ لەبان کڕ سنووری هاوسنوور وەرد ئیران بڵاو کردنە لە وەخت گرژبۊن رەوشە ئەمنی و سەربازییەیل لە ناوچەگە، و ئاگادارکردن حزبەیل ئۆپۆزسیۆن دژ وە رژیم لە تەهران وە ریپینەداین وەپییان وە هیچ شیوەیگ ئەرا جیوەجیکردن پەلامارەیل چەکداری دژ وە ئیران، و دیاری کرد کە هەرێم سەرکەفتگ بۊە لە وەڕیەوبردن رەوشە ناوخۆیی و دەرەکییەیل لە ماوەی جەنگەگە.
یەیش لە میانەی بەشداریکردنی هات لە دانیشتنیگ گفتوگۆیی تایبەت لەناو کارەیل دیدار "مێری" کە لە هەولێر بەسیاس.
سەرۆک نێچیرڤان بارزانی وت کە "سیاسەتمان لە سەرەتای جەنگەگەو رووشن بۊ، و وەردەوام و وە شیوەی رووژانە لە پەیوەندی بۊمن وەرد یەکێتی نیشتمانی کوردستان و بەغداد، و سیاسەتمان پشت وە تێوەنگلانن کوردستان وەی جەنگە وە هیچ شیوەیگ بەساوێد".
وتیش کە "ئیران هاوسامانە، و جەنگەگە جەنگ ئیمە نەۊ، و هەرێم کوردستان نیەودە شوین دەرچگنیگ ئەرا هەڕەشەداین لە ئیران، و هەرگیز نیەود هیزیگ چەکدار لە خاک هەرێمەو دەربچوود ئەرا هەڕەشەداین لە دەوڵەتە هاوسایەیل، چۊنکە یە لە ئاست ناودەوڵەتی رەتەوکریاگە، و یاسا و دەستوور عراقی ری وە ئەوە نیەن".
بەسانن سنوورەیل و قەیەغەکردن چالاکییەیل ئۆپۆزسیۆن
سەرۆک هەرێم رووشنەو کرد کە "لە رووژ یەکەمەو سنوورەیل بەسایمن و هیز لەبان هیڵ سنووری دانایمن، و وە هیزەیل ئۆپۆزسیۆن خەوەر دایمن کە ری وەپییان نیەیمن لە خاک هەرێم کوردستانەو پەلامار ئیران بیەن".
نێچیرڤان بارزانی وتیش "ئیمە لە کارە ستراتیژییەیل لە کوردستان و وەرد بەغداد رێککەفتیمنە، و ئی جەنگە ئەزموونیگ گرنگ بۊ و وە سەرکەفتنیگ گەورا لەلی دەرچگیمن، و وەگەرد جیاوازی و کێشە سیاسییە ناوخۆییەیلمان، وەلی ئەرا مقیەتیکردن قەوارەی هەرێم کوردستان وەرد یەک کار کردیمن و کار کەیمن".
ناوبژیوانی
لەباوەت ئەوەگ لە راپۆرت ماڵپەڕ "ئەکسیۆس" هاتیە، لەباوەت ئەو ناوبژیوانییە کە کوردستان لە ناوەین ئەمریکا و ئیران جیوەجیی کردگە، بارزانی دووپات کرد: "ئەو ناوبژیوانییە کە من پێی هەڵسم تا رادەیگ گەورا راسە. ئەوەگ لە راپۆرتەگە باس کریاس راسە، و من وەو رۆڵە هەڵسامە".
وەردەوام بۊ "وە بڕوای من، واشنتۆنیش وە ریز و سوپاسگوزارییەو نووڕستە ئی مەسەلە، هەرلیوا وەڵامدانیگ خاس لە لایەن ئیرانییەو لەی باوەتە ەبۊ، و یە کاریگ فرە خاسە".
پرۆسەی ئاشتی
لەباوەت پرۆسەی ئاشتی، بارزانی رووشنەو کرد: "ئەرا دەرفەتەیل، فرە لەلییان هەس. و ئەگەر باس لەو دەرفەتەیلە بکەیمن کە ئەرا کورد هانە وەردەس، ئیمە باوەڕ دیریمن کە جیاوازن وەپەی جیاوازی ئەو کاودان و رەوشەیلە کە کورد لە هەر ناوچە و دەوڵەتیگ لەناوی گوزەران کەێد، چ لە تورکیا بوود یا سووریا یا تەنانەت ئیران. دەرفەتەیلیگ هەس کە تۊنریەێد کار لەبانیان بکریەێد و وەکار باوریەن ئەرا چارەسەرکردن ئی کێشە وە شیوەیگ گشتی".
وتیش "ئەرا ئیمە لە هەرێم کوردستان، هەمیشە پرسیاریگ بۊ لەباوەت رادەی جدیبۊن ئی پرۆسە، و پیوەرەیل ناسریایگ هەس ئەرا دیاریکردن ئەوە، و من وەخوەم، لەڕی دیدارەیلم وەرد سەرۆک تورکیا رەجەب تەیب ئەردۆغان، و تەنانەت وەرجە ئەوەیش کە چەوم وەپی بکەفێد، وە شیوەیگ تەواو لە راسی رەوشەگە نەفامستیم. وەلی لە ماوەی دوو ساڵ گوزەشتە، جدیبۊن لە ئەردۆغان دیم لەی پرۆسە، و هەرلیوا جدیبۊن لە ئیمرالی و عەبدولڵا ئۆجەلان دیم، و لە برا ترەکە پەیوەندیدارەیل وەی مەسەلە".
دیاری کرد کە "باوەڕ دیرم ئی پرۆسە وە جدی وەڕیەو چوود، وەلی شایەت رەخنەیگ بوود وە مدوو خاوی گامەیل و یە کاریگ سروشتییە، چۊنکە ئیمە باس لە 40 ساڵ لە جەنگ و کێشەیل و نکۆڵیکردن کەیمن. وەختیگ وە دریژایی چل ساڵ وە گەلیگ ئۊشید کە بۊن نەیرێد، نیەتۊنریەێد گشت ئی کێشەیلە لە شەو و رووژیگ چارەسەر بکریەن".
وتیش "وەلی لە ماوەی دوو ساڵ گوزەشتە، کەسیگ نەکوژیا، و هیچ ژنیگ جەرگی ئەرا کوڕەگەی نەسزیا. راسە کە پرۆسەگە وە خاوی وەڕیەو چوود، وەلی جەنگ نییە، و تەنانەت ئەگەر دەسکەفتەیل ترەکیش وەدی نان، هەر تەنیا نەۊین جەنگ وە دەسکەفتیگ گەورا لە وەخت ئیسە هەژمار کریەێد، لە نووڕستن تایبەتی خوەمەو".
تەواو کرد: "تا ئی باوەتە ئەرادان رووشنەو بکەم، لە یەکیگ لە گردەوبوینەیل وە ئەردۆغان وتم کە جەهان فرە ئاڵشت بۊە. لەلیم پرسی: چە ئاڵشت بۊە؟ منیش وەپی وتم: ئایا باوەڕ کردیاد بڕەسیمنە قۆناغیگ کە ئیمە جویر کورد نزا لە خودا بکەیمن شیفای باخچەلی بەێد؟ لەو وەختە باخچەلی لە خەسەخانە بۊ، و یە بەڵگەس لەبان بۊین جدیبۊن لەی دۆسیە و لەی پرۆسە".
و فتراق دا وە ئەوەگ "ئەما دەور هەرێم کوردستان، وەختیگ باس لە هەرێم کەم، مەبەسم گشت هەرێمەگەس، لە هەولێر و سلێمانی. دەور ئیمە دەسمیەتیدەرە ئەرا ئی پرۆسە، و ئیمە پاڵپشتی لەی قۆناغە کەیمن، و هەردوگ لایەن ئاگادار کردیمنە کە هەر چشتیگ بکەفێدە بانمان ئەرا کردنی کەیمنەی، و وە راسیش ئەوە ئەنجام دایمنە".
دیاری کرد کە "سیاسەت هەرێم کوردستان، لە روی بنەماوە، لەبان ئەوە وسیاس کە ئی کێشەیلە وەپەی تایبەتمەندی هەر دەوڵەتیگ چارەسەر بکریەن، و لە چوارچیوەی ئەو دەوڵەتە کە پێکهاتەی کوردی لەناوی ژیەێد، و ئەگەر ئی کێشە چارەسەر بکریەێد، ئەوەیش بوودە قۆناغیگ نوو ئەرا هەرێم کوردستان لە لایەنە جویراجویرەیلەو".
لەباوەت سووریا، باس کرد: "لە سەردانم ئەرا سووریا، و ئەوەگ لە سەرۆک کۆمار ئەحمەد شەرع ژنەفتم، دوژمنایەتی ئەرا گەل کورد نەیرێد، و فرە لەی باوەتە قسە کردیمن. ئیمە گامەیل ئیسەمان ئەرا تێکەڵبۊن لە ناوەین هیزە ئەمنییەیل دۊنیمن کە ئی گامەیلە وە شیوەیگ خاس وەڕیەو چن، و ئەرا مەسەلەی خوەنستن کە مەسەلەیگ فرە گرنگە ئەرا کورد، پیشکەفتن لەی باوەتە هەس، وەلی وە بڕوای من تۊنیمن بۊشیمن کە پیشکەفتنیگ تەواو لەی باوەتە هەس وەختیگ مافەیل کورد و پێکهاتەیل ترەک لەناو دەستوور وە شیوەیگ تەواو بچەسپیەن سووریا تەنیا دەوڵەتیگ عەرەبی نییە، بەڵکم عەرەب و کورد و عەلەوی و درووز و ئەوانی ترەکیش ها لەناوی".
