نێچیروان بارزانی سوپاس تورکیا کەێد ئەرا ئاسانکردن گلەوخواردن هاوڵاتیەیل کوردستان دویای قەیەغەی ئاسمانی
شەفەق نيوز/ نێچیروان بارزانی سەرۆک هەرێم کوردستان، ئمڕوو دووشەممە، دەسخوەشی لە رۆڵ تورکیا کرد ئەرا ئاسانکردن گلەوخواردن هاوڵاتیەیل هەرێم کوردستان و عراق لە مەرزەیل سنووریەو دویای وسیان کاروانەیل ئاسمانی لەوەر جەنگ ئیسرائیل و ئیران.
نویسنگەی نێچیروان بارزانی لە بەیاننامەیگ رەسیە ئاژانس شەفەق نیوز وت: بارزانی پیشوازی لە ئەیرمان تۆبجو قونسوڵ تورکیا لە هەرێم کوردستان کرد، و لە دیدارەگە باس پەیوەندییەیل ناوەین تورکیا و عراق و هەرێم کوردستان کریا، و دویاترین نووەوبویەیل لە ناوچەی خوەرهەڵات ناوڕاس، هەمیش رخباری و سەختیەیل.
بەیانامەگە وتیش: باس جموجویل گەشتکردن و هامشوو لە مەرزەیل سنووری ناوەین هەرێم کوردستان و تورکیا کریا دویای وسانن کاروانەیل ئاسمانی لە عراق و هەرێم کوردستانەو.
لە بەیاننامەگە، نێچیروان بارزانی سوپاس لە لایەنەیل پەیوەندیدار تورکیا کرد، ئەرا پیشکەشکردن ئاسانکاری وە گلەوخواردن گەشتیار و هاوڵاتیەیل هەرێم کوردستان و عراق لە مەرزەیل سنووریەو، و وە شیوەیگ تایبەت رێز خوەی وە رۆڵ قونسوڵ گشتی تورکیا لە هەرێم کرد وە تیم کارکردنی.
لەلای خوەییش، قونسوڵ گشتی دووپات لە ئامادەیی لایەنەیل پەیوەندیدار تورکیا کرد ئەرا دابینکردن گشت ئاسانکارییگ ئەرا گەشتیارەیل و سەردانکەرەیل هەرێم کوردستان لەبان مەرزەیل سنووری، و لە خود وەختەگە دەسخوەشی لە فەرمانگە و لایەنەیل پەیوەندیدار بە هەرێم کوردستان کرد کە ئامادەکاریەیل تەواویان ئەرا ئی رەوشە جیوەجی کردن.
لە دیدارەگە باس باوەتەیلیگ کریا کە لەلای هەردوگ لایەن گرنگن.
