نێچیروان بارزانی پیرووزبایی لە نویسەرەیل کورد کەێد لە یاد دامەزریان یەکێتییان
شەفەق نیوز/ نێچیروان بارزانی سەرۆک هەرێم کوردستان، رووژ دووشەممە، پیرووزبایی لە نویسەرەیل کورد کرد، وە بوونەی پەنجا و پەنجەمین ساڵیاد دامەزریان یەکێتییان، و دووپات لە گرنگی رۆڵیان کرد ئەرا مقیەتیکردن ناسنامەی نەتەوەی و نیشتمان کورد.
سەرۆکایەتی هەرێم کوردستان لە بەیاننامەیگ رەسیە ئاژانس شەفەق نیوز وت: بارزانی وت: گەرمترین پیرووزبایی لە گشت نویسەرەیل لە هەر شوینیگ کەم، وە بوونەی پەنجا و پەنجەمین ساڵیاد دامەزریان یەکێتی نویسەرەیل کورد، ئومید وەردەوامی پیشکەفتن و سەرکەفتن ئەرایان خوازم، ئامادەییان وە رۆڵ پیرووزیان وە بەرز نرخنم لە خزمەت زوان و ئەدەب کوردی.
بارزانی وتیش: چەنای چەنیگ نویسەرەیل کورد وە دڵسووزی ئەرا مقیەتیکردن ناسنامەی نەتەوەیی و نیشتمانی کورد و کوردستان کردن، و دەسمیەتی لە بیناکردن کۆمەڵگەیگ هووشیار و گەش دان، و زیانەیل فرەیگ لەی ریە کیشان، و رۆڵ دیاریگ لە بتەوکردن رووشنهویری و ئەرزشەیل هاوبەش داشتن، و بەرزکردن ئەوەکە قبووڵکردن و وەخشین لەناو کۆمەڵگای کوردستانی، و جویر هەمیشە، ئیمە پشتگیری لەلییان کەیمن و پشتیان گریمن.
سەرۆک هەرێم کوردستان وتیش: نویسەرەیل کورد رۆڵیگ کاریگەر لە قۆناغەیل وەرین رانینە، کە هەرێم کوردستان و کۆمەڵگای کوردستانی ئمڕوو فرەتر لە هەر وەختیگ هەوەجە وە قەڵەم هوشیار و وەرپرسیان دیرێد، و هەمیش وە هویر و بنەمایل بەرزیان، ئەرا بتەوکردن یەکخستن و شانوەشانی و وەرگریکردن لە ماف و دەسکەفتەیل کوردستان.
لە کۆتایی وتیش: سڵاو لە گیان و ساڵیاد ئەو نویسەرەیلە کەیمن کە خزمەت ئەدەب کەلتور کوردی وە گشت دڵسووزیگ کردن، و وەگشت رێزیگ یادیان کەیمن.
