نێچیروان بارزانی دووپات لە پابەندبوین هەرێم کوردستان وە مقیەتیکردن ماف ژن کەێد
شەفەق نیوز/ نێچیروان بارزانی سەرۆک هەرێم کوردستان، ئمڕوو دووشەممە، دووارە دووپات لە پابەندبوین هەرێم کوردستان وە مقیەتیکردن ماف ژن کرد.
ئەوەیش لە بەیاننامەیگ وەبوونەی رووژ جەهانی ژن ئەرا لەناوبردن تونوتیژی وەبان ژن هات، کە رەسیە ئاژانس شەفەق نیوز.
بارزانی وتیش: دووپات ئەرا ژنەیل کوردستان کەیمن کە ئەوەسا وەگشت رەنجیگ وەردەوام بویمن لە کار ئەرا کۆتاییهاوردن وە گشت شیوەیل تونوتیژی و دووچەوەکی وەبان ژن، چوینکە توانادارکردنی خوەی بنەمای بیناکردن کۆمەڵگایگ دادپەروەر و پیشکەفتگە.
بارزانی وتیش: هەرێم کوردستان هەر لە زویەو پشتگیری لە ماف ژن کردگە، و دەرفەتەیل ئەرا بەشداریکردنی لە ژیان سیاسی و ئیداری وە یەکسانی وەرد پیاو پیشکەش کرد، دووپاتیش کرد کە ژن نەک تەنیا هاوبەشە لە دروسکردن بڕیار، بەڵکم بنەڕەتییە لە ئاڵشتکردن و ئەوزەڵکردن هەمیشەیی.
بارزانی داوای قایمکردن هاوکاری ناوەین دامودەزگایل حکومەتی و میدیایل راگەیانن ئەرا بڵاوکردن هوشیاری و قایمکردن بنەمایل وەخشین و یەکسانی، وتیش؛ لەناوبردن تونوتیژی وەبان ژن تەقەلا و رەنج هاوبەش وەلایەن گشتی خوازێد.
بارزانی لە بەیاننامەگەی دووپات کرد کە حکومەت وەردەوام بوود لە کاری وەبی هوچان ئەرا وەدەسهاوردن دادپەروەری و یەکسانی و قایمکردن توانای ژن ئەرا خزمەت بیناکردن کۆمەڵگا.
