نێچیروان بارزانی دووپات کەێد لەبان دویرکەفتن عراق لە جەنگ و ململانێی هەرێمی
شەفەق نیوز/ نێچیروان بارزانی سەرۆک هەرێم کوردستان، شەوەکی ئمڕوو چوارشەممە، وەگەرد موسەنا سامەڕائی سەرۆک فراکسیۆن عەزم لە پەرلەمان عراق، باس رەوشەیل گشتی وڵاتەگە، و هەڵوژاردن پەرلەمان کوردستان، و پەیوەندییەیل ناوەین هەولێر و بەغدا و هەڵوژاردن گشتی لە عراق کرد.
لەناو ئەو دیدارە، سامەڕائی پیرووزبایی لە سەرۆک نێچیروان بارزانی کرد وە سەرکەفتن هەڵوژاردن پەرلەمان کوردستان، وەگورەی بەیاننامەیگ لەلایەن سەرۆکایەتی هەرێم کوردستان.
وەگورەی بەیاننامەگە، هەردوگ لایەن ئافەرین لە وەردەوامی دانوسەنین وەردەوام ناوەین حکومەت هەرێم کوردستان و حکومەت فیدڕاڵی ئەرا چارەکردن باوەتەیل گیرهاتگ، و رێک کەفتن کە چارەکردن ئی گیچەڵەیلە کەفێدە بەرژەوەنی گشت عراق و ئارامی وڵاتەگە بەرزەو کەێد.
لەلاییگ ترەک لە دیدارەگە، هەردوگ لایەن باس رخدارەیل رەوش ئاڵووز لە خوەرهەڵات ناوڕاس کردن، و دووپات لەبان گرنگی دویرکەفتن عراق لە جەنگ و ململانێی هەرێمی و دویرکەفتنی لە کاریگەرییەیلی.
