نێچیروان بارزانی دووپات کەێد لەبان پاڵپشتیکردن پەیوەندییەیل وەرد ئیران
شەفەق نیوز/ نێچیروان بارزانی سەرۆک هەرێم کوردستان، ئمڕوو دووشەممە، دووپات کرد کە هەرێم کوردستان هەمیشە تەقەلا دەێد بوودە خاوەن کردار ئاسایش و ئارامی لە ناوچەگە، و نیوودە سەرچەوە هەڕەشە ئەرا دەوڵەتەیل هاوسا، و دووپات لەبان قایمکردن پەیوەندییەیل وەرد ئیران کرد.
سەرۆکایەتی هەرێم کوردستان لە بەیاننامەیگ رەسیە ئاژانس شەفەق نیوز وت: بارزانی پیشوازی لە مەجید تەخت روانجی جیگر وەزیر دەیشت ئیران و شاند یاوەری کرد، و لە دیدارەگە دووپات کریا لەبان قایمکردن پەیوەندییەیل ناوەین کۆمار ئیسلامی ئیران و عراق و هەرێم کوردستان، و فراوانکردن چینەیل هاوکاری هاوبەش، وەتایبەت لە چین ئابووری.
هەمیش را و نووڕینەیل لەبان جیوەجیکردن رێککەفن ناوەین عراق و ئیران کریا ئەرا مقیەتیکردن ئاسایش سنوور، و ئەو رۆڵە کە هەرێم کوردستان لەی چوارچیوە بڕانێد.
بارزانی دووپات کرد کە هەرێم کوردستان هەمیشە تەقەلا دەێد بوودە خاوەن کردار ئاسایش لە ناوچەگە، و وەهویچ شیوەیگ نەوودە سەرچەوەی هەڕەشە ئەرا دەوڵەتەیل هاوسا.
هەمیش باس گرنگی پەیوەندییەیل ناوەین هەرێم کوردستان و کۆمار ئیسلامی ئیران کرد، لە بنەمای خاس هاوسایەتی و بەرژەوەنیەیل هاوبەش.
هەمیشە باس رەوشەیل هەرێمی وەشیوەی گشتی کریا، وەگەرد بڕیگ باوەت خاوەن گرنگیدان هاوبەش، کە هویروڕا لەبان ئەو باوەتەیلە بەشیگ گرنگ بوین لە دیدارەگە.
دویای گردەوبوین، نێچیروان بارزانی سەرۆک هەرێم کوردستان و جیگر وەزیر دەیشت ئیران کۆنگرەیگ رووژنامەوانی ئەنجام دان، کە سەرۆک نێچیروان بارزانی لەناوی وت:
"وە گەرمی پیشوازی لە بەڕێز دکتۆر مەجید تەخت روانجی جیگر وەزیر دەیشت ئیران لە هەرێم کوردستان کەم، دووپات لەبان گرنگی پەیوەندییەیل میژوویمان وەرد کۆمار ئیسلامی ئیران کەیمن، کە لە بنەمای خاس هاوسایەتی و بەرژەوەنیەیل هاوبەش دروس بوی.
ئیران هەمیشە پشتگیر گرنگ بویە ئەرا هەرێم کوردستان و عراق، و ئیمە رێز و سوپاس لەی پشتگیریکردنە کەیمن وە جویراجویر قۆناغەیل".
وتیش: "لە هەرێم کوردستان ئەو باوەڕە دیریمن کە پەیوەندییەیل قایم و هاوسەنگ ناوەین عراق و کۆمار ئیسلامی ئیران گرنگە ئەرا پاڵپشتیکردن ئارامی لە ناوچەگە، و عراق و هەرێم کوردستان هەمیشە تەقەلا دەن ئەرا بیناکردن پەیوەندییەیلیگ لەبان رێزگردن و بەرژەوەنیەیل هاوبەش وەرد دەوڵەتەیل هاوسا، وەتایبەت وەرد ئیران".
بارزانی باس گرنگی فراوانکردن چینەیل هاوکاری ناوەین ئیران و عراق و هەرێم کوردستان لە جویراجویر کەرتەیل کرد، وەتایبەت لە ئابووری و بازرگانی و رووشنهویری و ئەمنی، ئەرا وەجیهاوردن ئاسایش و ئارامی و گەشەپیدان.
دووارە دووپات کرد کە "هەرێم کوردستان هەمیشە جی ئارامی مینێد، و ری نیەێد تا بوودە سەرچەوەی هەڕەشە ئەرا هاوسایلی، وەتایبەت کۆمار ئیسلامی ئیران".
لەلای خوەییش، مەجید تەخت روانجی جیگر وەزیر دەیشت ئیران وت: مە خوەشهاڵم چوینکە ئی دەرفەتە کەفتە دەسم ئەرا دیدار وەرپرسەیل لە هەرێم کوردستان، وەرجە سەردانکردن هەولێر لە بەغدا بویم، کە گردەوبوینەیل فرە خاسیگ وەرد وەرپرسەیل عراقی ئەنجام دام، لەناویان باس بڕیگ باوەت گرنگ کردیمن کە پەیوەندییەیل ناوەین وڵاتەیلمان قایمەو کەن.
وتیش: ئمڕوو لە هەولێر، دیدارەیل نەرێنی داشتیمن وەرد وەرپرسەیل لە حکومەت هەرێم کوردستان، لەلییان سەرۆک مەسعود بارزانی، و مەسروور بارزانی سەرۆک حکومەت، و ئیسەیش وەرد نێچیروان بارزانی سەرۆک هەرێم، و خوازم سوپاسیان بکەم ئەرا پیشوازیکردن گەرمیان.
روانجی دووپات کرد کە ئاسایش و ئارامی لە عراق و هەرێم کوردستان خوەی ئاسایش و ئارامی ئیرانیشە، ئەراوە دووپات لەبان گرنگی پاڵپشتیکردن هاوکاری ئەمنی کەیمن ئەرا نەهیشتن هەر هەڕەشەیگ.
لە کۆتایی وتیش: سوپاس لە سەرۆک نێچیروان بارزانی و وەرپرسەیل لە هەرێم کوردستان کەم ئەرا گەرمی پیشوازیکردنیان، و ئومید خوازم ئی گفتوگۆ و هاوکاریە وەردەوام بوود ئەرا بانانیگ خاستر وە گەلەیلمان.
