نێچیروان بارزانی داوا لە بەغداد کەێد رخی لە چەکدارکردن پیشمەرگە نەچوود: وەرگری لە عراق کەێد
شەفەق نیوز/ نێچیروان بارزانی سەرۆک هەرێم کوردستان، ئمڕوو پەنجشەممە، داوا لە حکومەت فیدراڵی کرد چەکدار هیزەیل پیشمەرگە بکەێد جویر بەشیگ لە سیستم وەرگریکردن سەربازی لە وڵات، دووپات کرد کە پیشمەرگە وەرگری لە عراق و هەرێم و گشت مرۆڤایەتی کەێد.
ئەوەیش لە وتاریگ هات لەناو رسوونەیل دەرچگن ئەفسەرەیل ٢٩ لە هیزەیل پیشمەرگە لە کۆلێژ سەربازی زاخۆ، کە شمارەی دەرچگەیل رەسیە ٧٩٢ ئەفسەر لەناویان ٥٠ ژنە.
سەرۆک نێچیروان بارزانی لە وتارەگەی وت: ئەوەگ جی خوەشاڵییە کە ٥٠ ژن ئەفسەر هانە ناو ئی دەرچگەیلە، ١٣ ئەفسەر لەلییان ئێزدیە، و یەک ژنیش کاکەییە، باس ئومید زیایکردن شمارەی ژنەیل لەناو رز ئەفسەرەیل لە هیزەیل پیشمەرگە لە خولەیل هاتگ کرد.
وتیش: هیزەیل پیشمەرگە ئەفسانەی داعش شکانن و ری وەو ریخریاگ تونەڕەوە نەیان باێدە نزیک کوردستان و پیشمەرگە نموونەیگ ئەرا ووێکرەی و پیشکەشکردن قوربانی نشان دا.
نێچیروان بارزانی سەرۆک هەرێم کوردستان سوپای لە هاوپەیمان ناودەوڵەتی کرد ئەرا هاوکاری و پیشکەشکردن پشتگیری و دەسمیەتی ئەرا پیشمەرگە و سوپای عراق لە جەنگ داعش، و باس ئەو پشتگیریکردنە وە ستراتیژی و یەکلاوەکەر کرد.
سەرۆک هەرێم کوردستان هەمیش داوای وەردەوامی هەماهەنگی و هاوکاری لە هاوپەیمان ناودەوڵەتی وەرد هیزەیل پیشمەرگە و سوپای عراق کرد.
دووپاتیش لەبان گرنگی وەردەوامی هەماهەنگی و هاوکاری ناوەین هیزەیل پیشمەرگە و سوپای عراق و حەشد شەعبی کرد ئەرا بتەوکردن ئاسایش و ئارامی لە عراق، وەتایبەت لە ناوچە دابڕیایەیل.
سەرۆک هەرێم کوردستان وتیش: هیمان ریخریاگ داعش رخیگ جدی لەبان ئاسایش و ئارامی عراق و ناوچەگە دیرێد، و فرە گرنگە هاوکاری و هەماهەنگی ناوەین پیشمەرگە و سوپا وەردەوام بوود.
نێچیروان بارزانی وتیش: چەوەڕی لە حکومەت فیدراڵی کەیمن ئەرک خوەی وەرانەور پیشمەرگە وەجی بارێد، وە چەککردنی و دابینکردن ئەوەگ خوازێد لە ئامرازەیل، و لەوە رخی نەچوود، چوینکە پیشمەرگە وەرگری لە عراق و کوردستان و گشت مرۆڤایەتی کەێد.
سەرۆک هەرێم کوردستان لە کۆتایی قسەیلی هەڵوێست کوردستان لە رەوشەیل ئیسەی ناوچەگە نووەو کرد، کە وت: کوردستان وەگەرد وسیان جەنگ و چارەکردن گشت قەیرانەیل و گیچەڵەیل وە ئاشتیانە وسێد، و سەر عراق نکریەێدە ناو ئی ئاڵووزیە لە ناوچەگە.
