نێچیروان بارزانی: حکومەت نوو عراق دەرفەت چارەکردن بەشیگ لە گرفتەیل وڵاتەگە دیرێد
شەفەق نیوز/ نێچیروان بارزانی سەرۆک هەرێم کوردستان، ئمڕوو سێشەممە، وت: حکومەت فیدراڵی ک تەگبیرە دروس بوود، دەرفەت چارەکردن بەشیگ لەو گرفتەیلە دیرێد ک کەفنە ری وڵاتەگە.
ئەوەیش لە چەوپیکەفتنی وەرد باڵیۆز شانشین یەکگردگ لە عراق، مارک برایسون ریچاردسون.
سەرۆکایەتی هەرێم کوردستان لە بەیاننامەیگ رەسیە ئاژانس شەفەق نیوز وت: لە دیدارەگە باس دویاترین نووەوبویەیل و بارودۆخ سیاسی لە عراق و هەڵوژاردن سەرۆک کۆمار و ئەرکدارکردن سەرۆک وەزیرەیل وە دروسکردن حکومەت نوو عراق کریا.
سەرۆک نێچیروان بارزانی دووپات لە گرنگی ئەوە کرد ک حکومەت نوو عراق گرنگیەیل کاری دیاری بکەێد، و خزمەتگوزاری پیشکەش بکەێد و دەرفەتەیل کار پەیا بکەێد، و دەرفەت چارەکردن بەشیگ لە گرفتەیل وڵاتەگە دیرێد، و بایەتە لایەنەیل عراقی هویر لەبنەمای بەرژەوەنیەیل گشتی وڵاتەگە بکەن، و وەشیوەیگ ستراتیژی و کار وەیەکەو ئەرا چارەکردن گرفتەیل و گلەوداین و مقەیەتیکردن ئارامی بکەن.
بەیاننامەگە وتیش " رەوشەیل ناوخوەیی هەرێم کوردستان چینیگتر بوین لەناو ئەو دیدارە، ک دووپات لە گرنگی مقیەتیکردن دووسی و یەکڕزی ناوبەین لایەن وپیکاتەیل هەرێم کوردستان کریا، و هەردوگ لایەنەگە ڕێک کەفتن ک دەوڵەتەیل برادەر و کۆمەڵگای ناودەوڵەتی لەنزیکەو چەویان ها دیار دیموکراتی لە عراق و هەرێم کوردستان، و مەزەنە کەن ئەو ریگر و گرفتەیلە لەڕی جیوەجیکردن هەڵوژاردن لاوریەێد.
لە چینیگتر لەو گردەوبوینە ک قونسوڵ گشتی بەریتانیا لە هەرێم کوردستان ئامادەی بوی، باس پەیوەندیەیل عراق و هەرێم کوردستان وەرد بەریتانیا کریا، و دەرفەتەیل فراوانکردن ئاسو هاوکاری هاوبەش وەتایبەت لە چین کاروبار و بەرهەمهاوردن، و پەیوەندیەیل عراق و هەرێم کوردستان وەگەرد دەوڵەتەیل هاوسا و ناوچەگە وە گشتی، وەگەرد باوەتەیلیگ ک لەلای هەردوگ لایەنەگە گرنگە.
