نێچيروان بارزانى داوا له لايه‌نه‌يل كوردستانى له سوريا ئه‌كا يه‌كگرتگ بوون
شه‌فه‌ق نيوز/ نێچيروان بارزانى سه‌رۆك هه‌رێم كوردستان, له ديدارى وه‌ل شانديگ ئه‌نجومه‌ن نيشتمانى كورد له سوريا(ENKS)، جه‌خت له گرنگى يه‌كگرتن و ئاشتى و هاوبه‌شى و له‌يه‌كڕه‌سينه‌وه‌و دروسكردن متمانه كرد له‌ناونى لايه‌ن و پيكهاته‌يل كوردستانى له سوريا, ئاماده‌يى خوه‌يشى ده‌رخست ئه‌را هاوكارى و پشتگيرى هه‌ر هه‌وڵيگ له‌وه‌ر خاتر ئاسايش و سه‌قامگيرى و چاره‌سه‌ر ئاشتيانه‌ى كيشه‌يل له ناوچه‌گه.
سه‌رۆكايه‌تى هه‌رێم كوردستان له به‌ياننامه‌يگ ئه‌را شه‌فه‌ق نيوز وت: بارزانى له هه‌ولێر پيشوازى له شانديگ باڵاى ئه‌نجومه‌ن نيشتمانى كورد له سوريا كردگه وه سه‌رۆكايه‌تى سعود ئه‌لمولاى سه‌رۆكى و وه‌ليا باس له دويا رويداگه‌يل و بارودوخ له سوريا و رۆڵ و كاريگه‌رى هيزه‌يل هه‌رێمى و ناوده‌وڵه‌تى كردگه له ناوچه‌گه.
به‌ياننامه‌گه يه‌يش ده‌رخست هه‌ردولا له‌و ديداره باس له خواست ئاشتى و قه‌بولكردن يه‌كترى له‌ناونى پيكهاته‌يل و لايه‌نه‌يل سوورى و كار له‌وه‌ر خاتر چاره‌سه‌ر كيشه‌يل و هاوردنه‌وه‌ى ئاسايش سه‌قامگيرى كردنه و نيگه‌رانى خوه‌يانيش ده‌رخستنه له‌باره‌ى هه‌وڵه‌يل ئالشتكارى ديموگرافى له ناوچه‌گه‌و ره‌فتار چه‌كداره‌يل ئۆپۆزسيۆن بيلايه‌ن سوورى.
