ژنيگ کورد خەڵک دهۆک وە ٤ هەزار دار بەڕوی (مەقلوب) زنیەو کەێد
شەفەق نیوز/ لە سای بیاوانیبوین و قەیران کەشوهەوا، و دویاکەفتن پووشین سەوزی لە عراق وە گشتی، ژنیگ کورد، ئەرک زیایکردن پووشین سەوزایی درەخت گردە گەردن خوەی، وە کاڵین ٤ هەزار دار بەڕوی لە کەژ کویەی مەقلوب لە قەزای عمادیە لە دهۆک.
زەکیە محمد، خانمیگ خەڵک ناحیەی شێلادزێ سەروە قەزای عمادیە، دەسکردە ئی هەڵمەتە، وە کاڵین ئەو دارەیلە لە ناوچەی بەردەڕەش لە کەژ کویە جیوەجی کرد.
زەکیە خان ئەرا ئاژانس شەفەق نیوز وت: ئی پڕۆژە خوازێد ناوچەی مەقلوب کە دار و سەوزی لەناوی نییە، وە سەرچەوەیگ ژینگەیی نوویگ دەوڵەمەن بکەێد کە دەسمیەتی لە نواگیریکردن بیاوانیبوین و زیایکردن هەمەڕەنگی ژیانی دەێد.
وتیش: ناوچەی ئیمە لە شێلادزێ و ناوچەیلیگ ترەک جویر زیباری و بارزان ئیجویر سەرچەوەیگ لەناوی دەوڵەمەنە، کە ٤٠٠٠ دار بەڕوی ئەرا ئی کارە گردەو کردم.
وەگورەی قسەیل خاوەن ئی هەڵمەتە، بڕیارە ئەو دار کاڵینە وە دوو قۆناغ بوود، کە بەش یەکەمی تەواو بویە، و ئەوەسا وە هەڵمەتیگ فراوان وەگەرد رووژ جەهانی دار کاڵین پڕۆژەگە تەواو کریەێد کە کەفێدە ناوڕاس مانگ شوبات ئایندە.
هەرێم کوردستان، وە نیشتمانیگ سەرەکی ئەرا دارەیل بەڕوی دریەێدە قەڵەم، کە وەشیوەی خەسیگ لەناوی هەس، وەتایبەت لە پارێزگای دهۆک، و بەشیگ گرنگە ئەرا سیستەم ژینگە، و شمارەیان وە مەلیۆنا لەناو دارستانەیل هەرێم کوردستان مەزەنە کریەێد.
