نارەزایی لەبان هاتن بەرهەمەیل بیانی.. جفتیارەیل "پێنجوێن" دەروازەیگ هاوسنوور وەرد ئیران بەسن
شەفەق نیوز ـ سلێمانی
جفتیارەیل قەزای "پێنجوێن" لە پارێزگای سلێمانی، ئمڕوو چوارشەممە، ری سەرەکیگ کە رەسێد وە دەروازەی "باشماخ" ناودەوڵەتی هاوسنوور وەرد ئیران بەسان، نارەزایی نیشاندان لەبان هاوردن بەرهەمە کشاوەرزی بیانیەیل، داوا لە حکومەت کردن ئەرا پاراستن بەرهەم ناوخوەی و نواگیری هاتن لە بەرهەمەیل وە ریگەیل نایاسایی.
پەیامنێر ئاژانس شەفەق نیوز وت، جفتیارەیل لە "پێنجوێن" ، شەوەکی ئمڕوو، لە دەروازەی قەزاگە خوەنیشاندانکردن و ری سەرەکیگ بەسان کە رەسێد وە دەروازەی ناودەوڵەتی "باشماخ"، ریگری کردن لە رەدبوین بارهەڵگرەیل کە کاڵا هەڵگردنە، یەیش جموجویل بازرگانی بان ریەگە وسان.
جفتیارەیل لە گفتوگوکردن ئەرا ئاژانسەگە ئاشکرایکردن، نارەزایی نیشاندانیان هاوکاتە وەرد وەرز بازاڕیکردن بەرهەمە کشاوەرزیەیل جویر تەماتە و ئاڵەت و کاڵەک، دیاریکردن هاتنەناو بەرهەمەیل بیانی کە ئوشن وە نایاسایی هاوردەکریەن بوودە مدوو داوەزانن نرخ بەرهەمەیلیان لە بازاڕ ناوخوەی و یەیش بڕ خەرج بەرهەمهاوردنیان پڕ نیەکەێد.
داوا لە حکومەت و لایەنە پەیوەنیدارەیل کەن رێکار وەربگرن ئەرا پاراستن برهەم ناوخوەیی و سنووردانان لە هاوردنە ناو بەرهەمەیل لە وەخت وەرز بەرهەمهاوردن، دووپاتکردن ئەوان بڕە پویل فرەیگ وەبان جفتکردن زەویەیلیان خەرجکەن، لە وەختیگ ئەوەسا بەرهەمەیلیان وە نرخیگ فرە هەرزان فروشیەێد، یەیش زەرەرد مادی وەپیان رەسانییە.
جفتکارەیل دووپاتکردن وەردەوامبوون لە نارەزایی نیشاندان و بەسانن ئەو ریە رەسێدە دەروازەی "باشماخ" وە روی بارهەڵگرەیل تا وەختیگ جواو داواکاریان دریەێد و رێکار ئەرا چارەسەرکردن گیچەڵ وە بازاڕیکردن بەرهەمەیلیان وەرگیریەێد.
