مەسرور بارزانی: چەوەڕی جیوەجیکردن بوودجەگە لەلایەن حکومەت عراق کەیمن
شەفەق نیوز/ مەسرور بارزانی سەرۆک حکومەت هەرێم کوردستان، ئمڕوو چوارشەممە، بڕیاردان بوودجەی دارایی ئەرا ساڵ ٢٠٢٢ وەەسکەفتیگ ئەرا گەل عراق دانا، و دووپات کرد ک حکومەتەگەی ئامادەس ئەرا جیوەجیکردن پابەندیەکانی لەباوەت بەش کوردستان لە بوودجەگە.
بارزانی لە کۆنگرەیگ رۆژنامەوانی ئاژانس شەفەق نیوز ئامادەی بوی وت: لەلای من وەڕیخستن بوودجەگە دەسکەفت گەورایگە ئەرا گەل عراق و گەل کوردستان و بایەت بوی بوودجەگە وەشیوەی گەورایگ بەکفتیادە ری، باوجی وەداخەو ک ئی باوەتە سیاسەتکاری کریا و ماوەی دریژیک وەپی چگ، وتیش؛ شاندە کوردەگە ئەوە ئەرا لایەن عراقی چەسپان ک گرفتەیل تەکنیکی و هونەری نیین بەڵکم ریگری سیاسی هەس.
هەمیش وت؛ بوودجەگە وەڕی خریا، بەڵکم داناییەگە هالە جیوەجیکردنی، ک بایەدە دویای بڕیاردان یاساگە وەگورەی کاریگەری گوزەیشتەیی جیوەجی بکریەێد، و ئیمە چەوەڕی کەیمن حکومەت فیدڕاڵی پابەندیەیلی لەنوای هەرێم جیوەجی بکەێد، و داوا لە گشت وەزارەتەیل کردیمن ئامادەکاریەیل ئی باوەتە ئەنجام بیەن.
هەمیش وت: جاریگ تر راگەینیمن ک حکومەت هەرێم ئامادەس ئەرا جیوەجیکردن پابەندیەکانی و چەوەڕی لە حکومەت فیدڕالی کەیمن ئەوەگ هالە بان خوەی جیوەجی بکەێد.
بارزانی ئاماژە کرد ک شاندەگەمان ئامادەس جاریگ تر روی وەرەو سەردان بەغداد بکەێد، و ئەگەر کارەگە خوازێد شاندیگ لە بەغداد سەردان هەرێم بکەێد.
بارزانی وتیش؛ بی گومان ئیمە ئەوەسا کار ئەرا دابینکردن شایستە داراییەکان ئەرا فەرمانبەرەیل هەرێم کەیمن، وەلێ بایەدە لەیاد نەوەیمن ک ئەو پابەندیەیلە ک کەفتنەسە گەردن هەرێم لە پڕۆژەی بوودجەگە کەم نیین، بەڵکم کارە سەرەتایبەگە کەفێدە دابینکردن مووچەیل ئیجا دەسکردن وە دابینکردن ئەو خوازینەیل تر، و ئەوەسا لە چاکسازیەگەیش وەردەوام بویمن.
سەرۆک حکومەت هەمیش وت: نێخوازم لە بنەمای گومان وەگەرد حکومەت عراقی رەفتار بکەیمن، و راسە ک ئیمە ئەزموون تاڵیگ دیریمن، بەڵکم ئومید خوازیمن حکومەت فیدڕاڵی پابەند وە ئەرکەیلی بوود، و شایستەیل ئەرا سێ مانگ گوزەیشتە رەوانە بکەێد، و بەراوردی لەناونی داهاتەیل و ئەوەگ وەری گریمن بکەێد.
