مەسرور بارزانی: قەیران مووچەی کوردستان کۆتایی تیەێد و بەغدایش شاندیگ ئەرا چارەسەرکردنی کلکەێد
شەفەق نیوز/ مەسرور بارزانی سەرۆک حکومەت هەرێم کوردستان راگەیان کە قەیران وسیان مووچەی فەرمانبەرەیل کەرت گشتی لە هەرێم لە ریە وەرەو چارەسەرکردن، و پەیوەندی وەرد سەرۆک دادوەری فایق زەیدان و سەرۆکوەزیرەیل فیدرالی محمد شیاع سودانی لەو باوەتە کردگە.
ئەوەیش لەناو کۆنگرەیگ رووژنامەوانی هات کە مەسرور بارزانی باس ململانێەیل ناوچەگە کرد و وت: "راگەیانن ئاگربەسی ناوەین ئیسرائیل و ئیران لە بەرژەوەنی گشتی وڵاتەیل ناوچەگەس، ئومید خوازیمن بوودە گامیگ وەرەو گلەوخواردن ئارامی و سەقامگیری لە گشت ناوچەگە".
وتیش: ئیمە لە هەرێم کوردستان گشت تەقەلایگ دایمن ئەرا دویرکەفتن لەی جەنگ و وەردەوەردە، ئەرک بان شان ئیمەس سوپاس لە محمد شیاع سودانی سەرۆک وەزیرەیل عراق بکەیمن، کە تەقەلا دا عراق لەی جەنگە دویر بوود.
لە باوەت پرس مووچەی فەرمانبەرەیل هەرێم کوردستان، سەرۆک حکومەت هەرێم کوردستان وت؛ لە ماوەی دوو مانگ گوزەشتە مووچەی فەرمانبەرەیل هەرێم کوردستان وەشیوەیگ یاسایی خەرج نەکریا، و یەیش وە ریکارەیگ نادەستووری دانریەێد، و نەبایەس مووچەی فەرمانبەرەیل هەرێم کوردستان گریە وە هەر ناکۆکییگ سیاسیەو بیریەێد، دووپاتیش کرد کە "وەهیچ شیوەیگ واز لە هیچ مافیگ دەستووری خەڵک هەرێمی کوردستان نیاریمن، وەردەوامیش بویمن لە زەرگریکردن لەلی"، وتیش: "لەماوەی گوزەشتە رووژیگ نەویە لەناو مینەکردن چارەسەری ئی قەیرانە نەویمن".
مەسرور بارزانی وتیش: "وەگەرد وەرپرسەیل پەیوەندی دیریمن، دویەکە وەرد سەرۆک داد و سەرۆک حکومەت قسە کردم، دڵنیام کردگە کە ئارەزوو چارەسەرکردن ئی قەیرانە دیرن، ئەوانیش پیشوازی کردن کە گامەیلیان و ئامادەیی خوەیان ئەرا کلکردن شاندیگ لە ماوەی دوو رووژ ئایندە ئەرا چارەسەرکردن پرسی مووچە دووپات کردن".
سەرۆک حکومەت هەرێم کوردستان باس لە وسانن هەناردەی نەفت کوردستان کرد و وت: لە ئەنجام "ئابووری عراق و ئابووریی هەرێم کوردستان زیان زیاتر لە 25 ملیار دۆلار لەشوینی بویە و تا ئمڕوو حکومەت فیدراڵی قەرەبوو زیانەیل هاووڵاتیەیل هەرێم کوردستان نەکردگە".
دووپاتیش کرد کە "تا هەناردەکردن نەفت کوردستان دەسوەپی بکەێد، بایەسە رێککەفتن وەرد گشت لایەنەیل بکرێد، وەتایبەتی وەرد ئەو کۆمپانیا نەفتییەیلە کە لە هەرێم کارکەن، کە داوای گەرەنتی ئەرا خەرج دراوردن نەفت کەن".
مەسرور بارزانی دیاری کرد کە "چەوەڕی بڕیار دادگای باڵای فیدراڵی عراق بویمن لە بەرژەوەنی مووچەی فەرمانبەرەیل هەرێم کوردستان، بەڵام لەوەر دەسلەکارکیشان شمارەیگ ئەندام دادگاگە هەڵوەشیاوە، ئیرنگە ئومیدمان کەفتیەسە لای ئەنجومەن باڵای دادوەری عراق ئەرا چارەسەرکردن قەیران مووچە".
سەرۆک حکومەت هەرێمی کوردستان لە هەمیش وت: "ئەگەر رێککەفتن وەرد حکومەت عراق نەکرێد ئەرا چارەسەرکردن کێشەی مووچە، پەنا وە داهات ناوخۆ، کەمکردن خەرجی، یا هەر رییگ ترەک بەیمن ئەرا پەیاکردن ئەو مافە داراییەیلە کە شایستەی خەڵک هەرێم کوردستانن، وەگورەی توانامان". وتیش: بەڵام گەشبینم وە رەسین ئەرا چارەسەریگ گشتگیر وەرد حکومەت فیدراڵی لەبان ئی باوەتە.
