مەسرور بارزانی: پرۆژەی چاکسازی پەیوەندی وە قەیرانە ئابووریەگە و کەمکردن مووچە نەیرێد
شەفەق نیوز/ مەسرور بارزانی سەرۆک وەزیرەیل حكومه‌ت هەرێم کوردستان، ئمڕوو شەممە، گریەداینەگە رەتکرد لە ناوبەین پڕۆژەی چاکسازی حکومەت وەل قەیرانە داراییەگە و کەمکردن مووچە، و دووپاتکرد ک خەم یەکەم حکومەتەگەی ئیسە بویەسە دابینکردن مووچەی فەرمانبەر و کارمەندەیل کەرت گشتی، و خانەنشینەیل.
بارزانی لە وتاریگی ئمڕوو، لە مەراسیم داناین سەنگ بنەڕەتی ئەرا پڕۆژەی جاده‌ی ١٠٠ مەتری لە سلێمانی وت؛ خەڵک پارێزگاگە شایستەی ئیجوور پڕۆژەیگن، بەڵکم لەیە خاستریش، ئاماژەدا؛ ک حکومەتەگەی و لەناو بەڕنامەیلی یا ئەو پەیمانەیلە ک داگەسەی تەواوکردن پڕۆژەیل ژیربنایی لە هەرێم کوردستانه.
وتیش؛ حکومەت هەرێم پەیمان داگە وە پێشکەشکردن خزمەتەگان ئەرا هاووڵاتی کوردستان وەبی جیوازی، وەلی وەداخەو کەفتیمنە وەر قەیرانەیلیگ لە شوون یەک، لەلیان قەیران دارایی و بڵاوبوین ڤایڕۆس کۆڕۆنا، بەڵکم نیاز وەهێزیگ دیریمن ک نەیلیمن ئیجوور کارەیلیگ ریگری بکەێد لە کار ئەنجامداین پڕۆژە وپێشکەشکردن خزمەت.
بارزانی وتیش؛ حکومتەتەگەی ئیسە، هەرچەن هاوپەیمانیە لە حزبەگان، بەڵکم خوەی حزبی نیە، و وەزیریگ لەناومان نیە وە نەفەس حزبایەتی کار بکەێد، و جەخت کەیمن لەبان کارکردن جوور یەک تیم وەبی جیوازی ناونی هاووڵاتیەیل.
لە قسەگەی باس قەیرانە ئابووریەگەی وەردەم هەرێم کرد، و هاوردەوەی ئەرا بڵاوبوین ڤایڕۆسەگە و داوەزین نرخ نەفت لە بازاڕە جهانیەگان، ک گاریگەری لەبان فەرە دەوڵەت داشت، و هەرێم کوردستان جیا نیە لەی رەوشە.
لەباوەت پڕۆژەی چاکسازیەگە ک حکومەتەگە دەسکردە پی، بارزانی وت: نەبایەس تیکڵایی بکەیمن ناوبەین ئی پڕۆژە و قەیرانە ئابووریەگە لە هەرێم، ئیمە وەرده‌وامیمن لە ئەنجام داین ئی پڕۆژە، وەلی چشتیگ نیە وه شەو ورووژیگ تەواو بوود.
لە باوەت کەمەوکردن مووچەیل له لاین حكومه‌ت، سەرۆک وەزیران هەرێم وت: کەمەوبوین داهاتەیل حکومەت لەوەر کۆڕۆنا وهەمیش بڕین بەش کوردستان لە لایەن حکومەت فیدڕاڵی ئەرا دابینکردن مووچەیل بویە هووکار کەمکردن مووچە وە دیرکەفتن لە خەرجەگەی، و دووپاتکرد ک ئەو خوەنستنە ک باس پەیوەندی پڕۆژەی چاکسازی وە کەمکردن مووجە کەێد راس نیە.
بارزانی هەمیش وت: ناچار بویمن لە کەمکردن مووچەیل، و یەکەمین خەم ئیمە ئیسە ئەوەسە ک چوون دابینی بکەیمن.
لەلای خوەییش پارێزگار سلێمانی هەڤاڵ ئەبوبەکر لە وتاره‌گەی لە مەڕاسم کردنەوەگە وت: ئی پڕۆژە لە پڕۆژە یل ئستڕاتژی و گرنگە ئەرا پارێزگاگە، وقۆناغە یەکەمەگەی خوەی گرنگترە.
وتیش هەمیش پڕۆژەیلیگ تر هەس ئەوەسا جیوەجی کریەێد لە پارێزگاگە، و دووپات کرد ک مەسرور بارزانی پشتگیری تەواو نشان دا ئەرا تەواوکردن پڕۆژەی ١٠٠جاده مەتریەگە لە سلێمانی.
لە لای خوەییش، فاخر شێخ تەیب وەڕیەوبەر جیوەجیکار کۆمپانیای قەیوان ک پڕۆژەگە جیوەجی کەێد وت: پرۆژەگە زەمینەی ژیربناییه ئه‌را هەرێم کوردستان، و بوودە هووکار ئەرا زیایبوین جوولەی بازرگانی، وهیلێد پارێزگاگە وە سیمایگ رەنگین ئارازیه‌ید .
وتیش؛ کۆمپانیاگە رکدارە لەبان تەواوکردن پڕۆژەگە لە رووژ دیاری کریاگ خوەی، وکۆمپانیای قەیوان گرنگی دەێدە توکمەیی لە ئەنجامداین کارەگان، و پەیمان دەێد لە تەرخانکردن گشت تواناگان ئەرا ئەنجامداین پڕۆژەی ١٠٠ مەتری وەخاسترین شیوە.
ری خێرای ١٠٠ مەتری، جادە پەلیەگان سلێمانی وەیەکەو بەسێدەو وەدریژی ١٤٦ کلم و پڕۆژەگە وەسێ قۆناغ ئەنجام دریەێد.
حکومەت هەرێم کوردستان بایی ٤٠٠ ملیار دینار ئەرا دروسکردن ئی پڕۆژە تەرخان کرد، ک یەکەمین قۆناغەگەی ٣٢ کلم لە ریە خێراگە گریدەو.
پڕۆژەگە ٧ پرد هاناوی ئەرا رەدبوین ماشین، چواریان گەورایە و سێیان بویچگ، و هەمیش هەیشت پرد ئەرا پیادە.
