ميوان شه‌و.. ديوانيگ شعرى كامل به‌گ سوره‌مێرى
ئى ديوان شعريه وه‌ناونيشان"ميوان شه‌و"فيشتر له 30 پارچه شعر ستوينى وه شيوه‌زووان كوردى كه‌ڵهوڕى خانه‌قينى(فه‌يلى)گرته‌سه خوه‌ى و دابه‌ش كريانه له‌بان 80 لاپه‌ڕه، ك له‌لايه‌ن نويسه‌ر و رووژنامه‌نويس ماجد سوره‌مێريه‌و گرده‌و كريانه‌و له‌لايه‌ن هونه‌رمه‌ند مونا محه‌مه‌د غوڵاميشه‌و وه‌رگ كتاوه‌گه نه‌خشه‌و ديزاين كرياگه‌و له چاپخانه‌يل ده‌زگاى ئه‌لغىيس له به‌غدا له‌چاپ دريا.
جى باسه، شاعر كامل جه‌ميل به‌گ له شار خانه‌قين هاته‌سه دونياو له بوار ره‌سانن و رووژنامه‌گه‌رى كار كردگه‌و زويتريش دو بڕه شعرى تر بڵاو كردگه‌و يه‌كيگ بوى له‌و كه‌سه‌يله ك ئاواره‌ى باشوور عراق كريا دوياى كپه‌وكردن شووڕش كورد ساڵ 1975 و تويش مه‌ينه‌تى و سه‌ختيه‌يل فريه‌يگيش هاتگه له‌لايه‌ن ده‌سڵاته‌يل رژيم وه‌رين له‌وه‌ر ئه‌وه‌گ باوگى له شه‌هيده‌يل جمشت رزگاريخواز كورد بوى و له‌لايه‌ن رژيم به‌عسه‌و بيسه‌روشوون كريا.
