کۆمسیۆن: ئاشکراکردن ئەنجامەیل هەڵوژاردن وەماوەی ٢٤ ساعەت

شەفەق نیوز/ کۆمسیۆن باڵای سەروەخوەی هەڵوژاردن لە عراق، ئمڕوو یەکشەممە، دووپات کرد کە ئەنجامەیل سەرتایی لە هەڵوژاردن پەرلەمان هەرێم کوردستان دویای ٢٤ ساعەت لە بەسیان سەندووقەیل دەنگدان ئاشکرا کریەێد.

نبراس ئەبو سەدە دەسمیەتیدەر قسەکەر کۆمسیۆن ئەرا ئاژانس شەفەق نیوز وت: ئەنجامەیل هن دەنگدان گشتی وە دەنگدان تایبەتە.

وتیش: پیشکەشکردن سکاڵا لەباوەت کارەیل هەڵوژاردن لە رووژ دەنگدان بوود، و تا ماوەی ٤٨ ساعەت دویای بەسیان سەندووقەیل، ئەوانە لەباوەت شیوەی کاروبار و وەڕیەوبردن هەڵوژاردنە.

 ئمڕوو یەکشەممە، دەسکریا وە دەنگدان گشتی لە هەرێم کوردستان، دویای تەواوبوین دەنگدان تایبەت کە رووژ جمعەی گوزەشتە ئەرا هیزەیل ئەمنی و پیشمەرگە وەڕیەو چگ.

 کۆمسیۆن باڵای سەروەخوەی هەڵوژاردن 1622 بنکەی دەنگدان واز کرد ئەرت 2,683,618 دەنگدەر لە بڕ 2,899,578 دەنگدەر.

کۆمسیۆن راگەیان کە ریژەی بەشداریکردن لە دەنگدان تایبەت رەسیە 97%، کە 215,960 ئەندام لە هیزەیل پیشمەرگە و ئاسایش ناوخوەیی دەنگ خوەیان دان.