لەوەر تەقینەوەیل غاز.. ئاهەنگ فەرمی وە سەر ساڵ زایینی لە هەرێم کوردستان نییە
2022-12-22T12:25:40+00:00
شەفەق نیوز/ فەرمانگەی راگەیانن و زانیاری لە حکومەت هەرێم کوردستان، ئمڕوو پەنجشەممە، خەوەردا ک لەوەر رویداوەیل تەقیان غاز بڕیار هەڵوەشیان ئاهەنگەیل فەرمی وە سەر ساڵ زایینی لە سێ پارێزگاگە دریا.
فەرمانگەگە لە زوان سابر حسێن وەڕیەوبەر راگەیانن لە پارێزگای هەولێر پایتەخت وت: وەگەرد هاتن ساڵ نوو، بەشیگ ئامادەکاری کریەێد، جویر هەڵڕازانن قەڵای هەولێر و دەورگردی، وتیش: لەوەر رویداوەیل تەقیان غاز لە پارێزگای سلێمانی و دهۆک، هویچ رسوومەیل ئاهەنگ فەرمی وە سەر ساڵ لە ئاست پارێزگاگە نیەکریەێد، وەلی خەڵکەگە توەنن ئەرا خوەیان وەختیگ خوەش وەسەر بوەن.
لەلای خوەییش، ساڵح رەحمان محمد وەرپرس بەش راگەیانن لە پارێزگای سلێمانی وت: لەوەر ئەوە ک پارێزگای سلێمانی کەفتە وەر تەقیان لە تووڕ غاز و کەفتن بڕیگ قوربانی، هویچ بوونیگ فەرمی ئەرا ئی ساڵە دیاری نیەکریەێد، وەلێ مەردمەگە توەنن ئەرا خوەیان نشان خوەشییان بیەن.
لە خود وەختەگە، بڕیار نییە هویچ چالاکییگ فەرمی لە پارێزگای دهۆکیش وەی بوونە بکریەێد، وەگورەی قسەی فەرمانگەی راگەیانن و زانیاری.
