لە هەولێر.. کۆمپانیایگ درووکانی کەسەیلیگ خەڵەتنێد
شەفەق نیوز/ دۊیەشەو، خەوەرەیلیگ لە دزیکردن ماشینەیل نوویگ لە گەڕەک وەزیران رەسی، ک یەکیگە لە باڵاترین گەڕەکەیل شار هەولێر پایتەخت هەرێم کوردستان، تا دۊیای ئەوە ئاشکرا بوود ک کۆمپانیایگ درووکانی گوایە کار ئەرا دابینکردن دەرفەت کار کەێد، چەن کەسیگ خەڵەتانیە و دەسناسە بان ماشینەیلیان هەنای پەیوەنی ماشینەیلە وە سیستەم GPS کردگە.
ئەو کەسەیلە ک ماشینەیلیان دزیاگە، و هەیشت ماشین مارکەی لاندگرۆزەر فۆرویل بۊینە، لەوەردەم بارەگای درووکانی کۆمپانیاگە گردەو بۊین، و داوا لە دەسەڵاتە ئەمنیەیلە کردن دەس بیەنە وەر، چۊنکە بڕیگیان پۊل ماشینەیلە وەقەرز هاوردنە، و بڕیگیانیش ماڵەیل خوەیان ئەرای فرووشتنە.
ئەو کارە دەس وەپیکردگە، هەنای کۆمپانیایگ درووکانی لە هەولێر ئاشکرای خوەی کردگە جۊر کۆمپانیایگ ئەرا پەیاکردن دەرفەت کار ئەرا هەر کەسیگ ماشین لاندگرۆزەر فۆرویل دیرێد، و مۆدیلیان لەبان ٢٠١٧ بوود، تا ٨ کەس پەیوەندی وەکۆمپانیاگە بکەن، و بچن تا کار وەگەردی بکەن. کۆمپانیاگە هەر هەشت ماشینەگە وەگەرد سیستەم دیاریکردن شۊن GPS بەساگە، و دەسناسە بانیاژلن، و لە دۊیەشەوە کەس نێزانێد ئەو ماشینەیلە چە وەپیان هات.
نرخ هەر ماشینیگ لەوانە رەسێدە ٥٠ هەزار دۆلار ئەمریکی.
کۆمپانیاگە وتیە گوایە ١٨٠٠ دۆلار ئەمریکی مانگانە دەێدە هەر رانندەیگ، وە مەرجیگ ماشینەیلە لەناو بارەگای کۆمپانیاگە بوون، و سیستەم GPS ئەرایان بنریەێد.
