لە چەن مەتر دوایی.. ریژەی بەشداریکردن لە بنکەیل دەنگدان لە کوردستان زیای کردووە دویای وەگەرد کیچەڵ پەنجەموور (وینە)

 شەفەق نیوز/ قۆناغ دەنگدان گشتی ئەرا هەڵوژاردن پەرلەمان کوردستان لە مەترەیل دوایی، بەشداریکردن وەشیوەی وەرچەویگ زیای کرد لە تەڤەلای سودوەرگردن لەو ماوە کە مەنیە.

وەگەرد زیایبوین ریژەی بەشداریکردن، کۆمسیۆن هەڵوژاردن دووپاتیکرد کە ماوەی دەنگدان درویژەو نیەکریەێد، وتیش: وەخت دیاریکریای جویر خوەی مینێد و لە ساعەت شەش ئیوارە،   ئاڵشتکاری وەبانی نیەتێد.

 پڕۆسەی هەڵوژاردن وەگەرد چەن سەختییگ تەکنیک بوی، دیارترینیان کێشەی نەخوەنستن پەنجەموور ئامێرەیل دەنگدان بوی، یەیش بویە مدوو ئەوەگ هەزاران دەنگدەر لە دەنگدانیان بیبەش بکریەن.

کۆمسیۆن دووپات کرد کە ڕاپۆرت لەبان ئەو کێشەیلە لە فرە ناوەندەو وەپی رەسیە، کە ئامێرەیل نەتوەنستنە پەنجەموور بەشیگ لە دەنگدەران بناسن، یەیش ناڕەزایی فراوانیگ لای ئەو هاوڵاتیەیلە لەلی بویەو کە نەتوەنستن بەشداری بکەن.

 لە ئاشکراکردن ئەو باوەتە، کۆمسیۆن ئەرا ئاژانس شەفەق نیوز راگەیان کە مدووەیل گلەو خوەن ئەرا ئەو  چشتەیلە کە پەیوەندی وە خود دەنگدەرویل دیرن، جویر نەخوەنستن پەنجەموور تا ئەو مدووەیلە کە کاریگەری لەبان پەنجەموور دیرن، جویر هشکبوین یا زەخم.

 وەگەرد یەیش کۆمسیۆن دووپات کرد کە وەردەوامە لە چەودیاریکردن جیوەجیکردن پرۆسەی هەڵوژاردن و یێشکەشکردن پاڵپشتی تەکنیکی ئەرا بنکەیل 

 ئەرا دڵنیایی لە یەکپارچەیی دەنگەیل و هویردی ئەنجامەیل، وتیش: ئەنجامە بەراییەیل لە وەختیگ دویاتر ئاشکرا کریەێد دویای بەسیان سەندووقەیل دەنگدان و دەسکردن وە شماردن دەنگدان.

قسەکەر کۆمسیۆن هەڵوژاردن 

 ئەیسەر یاسین لە کۆنگرەیگ رووژنامەوانی وەرجەیە ئمڕوە وت: ریژەی بەشداریکردن لە هەڵوژاردن تا ساعەت 12ی نیمەڕو وەیجویرە بوی: دهۆک: 31%، هەولێر: 34%، سلێمانی: 29%، هەڵەبجە : 33%، وەیەوە ریژەی بەشداری گشتی رەسێدە 31%.