لەسێدارەداین لەبان بکوش خیزانیگ تەواو لە هەولێر
شەفەق نیوز- هەولێر
دادگای تاوانەیل هەولێر، ئمڕوو چوارشەممە، سزای لەسێدارەداین دەرکرد وەرانوەر تاوانباریگ وە تاوان کوشتن خیزانیگ کە سێ کەس بۊن وەگەرد دزین ماڵ و داراییی، و یەیش لە یەکەمین دانیشتنەیل دادگاییەگە.
هۊردەکارییەیل تاوانەگە گلەو خوەێد ئەرا مانگ کانوون دۊەم گوزەشتە، وەختیگ تاوانبارەگە هەڵکوتاسە بان ماڵیگ لە شار هەولێر، و هەڵسیا وە کوشتن پیاویگ و ژنەگەی و کوڕەگەیان وە وەکارهاوردن چەکیگ چەرمگ (چەقوو)، وەرجە ئەوەگ دەس بگرێدە بان پۊل و کەلوپەلەیل ناو ماڵەگە، وەگەرد ماشین قوربانییەیل.
هیزەیل ئەمنی لە هەولێر تۊنستن تاوانبارەگە دەسگیر بکەن دۊای چەن رووژیگ لە رۊداین تاوانەگە، و کلکردنی ئەرا لایەنە پەیوەندیدارەیل ئەرا تەواوکردن لێکۆڵینەوە و رێکارە یاساییەیل.
پارێزەر دۆسیەگە، کاروان سورچی، ئەرا ئاژانس شەفەق نیوز وت، کە "توومەتبارەگە سزادریایە وە کوشتن سێ کەس وە وەکارهاوردن چەقوو و ئەنجامداین تاوان دزی"، و دەسنشان ئەرا ئەوە کرد کە "لە سەرەتای کارەگە تەقەلا داگە نیشانەیل تاوانەگە بشارێدەو و لە ئامراز کوشتنەگە و بەڵگەنامە فەرمییەیل قوربانییەیلە قورتار بوود، وەلی دەزگایەیل ئەمنی کوڵەیگ توکمە ئەڕای نانە و دەسگیری کردن".
سورچی هەمیش وت کە "لە بنەمای راپۆرتەیل پزیشکی دادوەری، و ئاشکراکردن نیشانەیل شانۆی تاوانەگە، و دانپیادانان راشکاو توومەتبارەگە بی پیشکەشکردن هیچ وەرگرییگ لە خوەی لەوەر ئاشکرایی بەڵگەیل، دادوەر دادگاگە ئمڕوو سزای لەسێدارەداین وەرانەور تاوانبارەگە دەرکرد، تا دۆسیەگە بوەسیەێد و کل بکریەێد ئەرا دادگای وەپیاچگن ئەرا پەسەنکردنی وەپای بنەما یاساییەیل".
