لە ساڵیاد نەهامەتی ئەیزیدیەیل.. نێچیروان بارزانی: خوازیمن شەنگال بوودە پارێزگا
![لە ساڵیاد نەهامەتی ئەیزیدیەیل.. نێچیروان بارزانی: خوازیمن شەنگال بوودە پارێزگا](https://media.shafaq.com/media/arcella/1627978291864.jpg)
شەفەق نیوز/ نێچیروان بارزانی سەرۆک هەرێم کوردستان، ئمڕوو سێشەممە، وەبۆنی هەفتەم ساڵیاد داگیرکردن قەزای شەنگال لەلایەن داعش و کۆمەڵکوژی دژوە کورد ئەیزیدی بەیاننامەیگ دەرکرد.
سەرۆک بارزانی لە بەیاننامەیگ رەسیە ئاژانس شەفەق نیوز وت: هەرچەن بە هەفتە ساڵە رەد بویە، ئیمە و گشت بیمارەیل تیمار لە شۆک وەحشیەت و تاوان تیرۆرەیل داعش نەویمنە، وەلێ خوەشک و برا ئەیزیدیلیلە لە هەرێم کوردستان و عراق مەزەنە خوەیان دیرن، و بایەتە گشت لایەنەیلمان رەنجەیلیان خەسەو بکەن ئەرا چارەی کرفتەیلیان و دابینکردن خوازینەیلیان، تا بتوێەنن وە پاڵپشتی گشتی گامەیل کونجیاییگ وەرەو تیماری زەخمەیلیان بوەن وەرەو ئاشتەوایی و دویارووژیگ خاستر و ژیاینگ ئارام.
و جەخت کرد ک بایەتە ئاست بەشداری و هاوبەشی راستەقینەی ئەیزیدیەیلە و گشت پێکهاتەیلا بەرز و فراوان بکریەێد، وەگورجیی لە باوەتەیل سیاسی و دەسەڵاتی و حکومەتی و ئیداری و یاسایی و کۆمەڵایەتی لە عرلقڵو هەرێم کوردستان زیایەو بوود، بایەتە کار هاوبەشی زیاتر ئەرا رزگارکردن رفیایەیل ئەیزیدی و ئاشکراکردن و یەکلاکردنەوەی چارەنووس بیسەروشوینەیل لەلیان پەیا بکریەێد، و بایەتە ئاسایش و ئارامی بچەسپنێد و ناوچەیلیان مقەیەتی بکریەن، و ئاوەدانیان دووارەو بوود تا بتوێەنن وە سەربەرزی گلەو بخوەن، و لە گشتی گرنگتر ئەوەسە ک گشتمان وەیکەو هاوکاری بکەیمن تا باوەڕی و دڵنیاییان باێدەو.
سەرۆک هەرێم دووپات کرد ک پێکهاتەی ئەیزیدی ئەرا هەزاران ساڵە یەکیگە لە بنەڕەت رەسنەیلە ئەرا پێکەوەژیان و وەخشین و یەکقبووڵکردن، لەبان گشت ئەو کارەساتەیلە ک وە دریژایی میژوو وەپیان رەسینە، و زەردەیل گیانی و دارایی، قەت باوەڕیان وە ئاین خوەیان لەدەس نەوردن، وئیمە دڵنیایمن ک وە باوەڕ و خوازین وەهێزیان زەخمەیل خوەیان تیمار کەن، باوجی بایەتە ئیمە و گشت مرۆیی بڕوا و دڵنیایی وەپیان بەیمەن، و کار لە ئاست ناودەوڵەتی بکەیمن تا کارەسات شەنگال و ئەیزیدی وە جینۆساید بیریەێدە قەڵەم.
سەرۆک بارزانی پیشوازی لە گامەیل دویایین کرد لە عراق و لە پەرلەمانەیل بەلجیکا و هۆڵەندا و گامەیل وەرینیش، و ئەوەسا وەردەوام لە هەماهەنگی و هاوکاری لەی ریە بویمن وەگەرد نەتەوە یەکگرتگەیل وەیۆنایتید و کشت لایەنە پەیوەندیدارەیلە و کۆمەڵگای ناودەوڵەتی وەشیوەی گشتی، کار کەیمن تا تاوانکارەیل داعش سزای یاسایی خوەیان بووەتە و داد قوربانیەیلە جیوەجی بوود.
وتیش؛ دووپات گشت پشتگیریمان ئەرا داوای ئاڵشتکردن شەنگال لە قەزا ئەرا پارێزگا کەیمن، و کار وەگەرد حکومەت فیدڕاڵی عراقی و پارێزگای نەینەوا ئەرا سەرکەفتن ئی پڕۆژە کەیمن.
و داوا لە حکومەت عراق کەیمن قوربانیەیل دە و خیزان و کەسوکارەیلیان وەگورەی یاسای رزگاربویەیل ئەیزیدی ک ئەنجومەن نوێنەرەیل واژووی کردگە قەرەبوو بکریەن.