لەبان کوشتن "ئەمینی".. وسیانیگ شەرمەزارکردن سیاسەتەیل ئیران لە هەولێر.. وینە
شەفەق نیوز/ بڕ گەورەیگ لە جالاکوانەیل لە وەردەم بارەگای نەتەوە یەکگرتگەیل لە شار هەولێر پایتەخت هەرێم کوردستان، ئمڕوو شەممە، گردەو بوین، وە ناڕەزایی لەبان کوشیان مەهسا ئەمینی ئەو دویەت ئیرانیە، لەناو زیندانەیل تەهران وەرجە چەن رووژیگ.
چالاکوان ئیرانی محمد عەزیزی ک لە ناڕەزاییەگە بەشدار بوی ئەرا ئاژانس شەفەق نیوز وت: ئمڕوو هاتیمنەسە ئیلا ئەرا شەرمەزارکردن سیاسەتەیل ئیران لەڕوی گەل کورد و هەمیش وەی تاوانە وەدەس رژیم ئیران لەبان ئی دویەتە.
لەلای خوەییش، خانمە چالاکوان ئیرانی سوها زەهاوی لە قسەیلی ئەرا ئاژانس شەفەق نیوز وت: هاتن ئی شمارەی فرە لەی مەردمە، بەڵگەس لەبان رەتکردن سیاسەتەیل ئیران تایبەت دژوە ژن، ک ئمڕوو خوازیمن پەیامیگ ئەرا کۆمەڵگای ناودەوڵەتی وە گردەوبوین لە وەردەم بارەگای نەتەوە یەکگرتگەیل لە هەولێر کل بکەیمن، تا دژ وەی رژیم دیکتاتۆریە بکەفنە جویلە.
هەرلیوا، ناڕەزایل لە هەولێر، دەوشم ئەرا پشتگیریکردن ژن لە ئیران چڕین وە " ژن ژیان ئازادی" وەگەرد دروشمەیلیگتر دژوە رژیم ئیرانی.
