له‌بان جاڕيگ كشتوكاڵى له سلێمانى جه‌نگ روێداو سێ كوشيان و زه‌خمدار بوين
شه‌فه‌ق نيوز/ وه‌ريه‌وبه‌رايه‌تى پۆليس راپه‌ڕين، ئاشكراى ناكووكييگ كرد له‌ناونى مه‌ردم هه‌ردوگ ئاوايى ده‌شتيوان و قه‌ڵاتوكان سه‌ر وه ناحيه‌ى سه‌نگه‌سه‌ر له قه‌زاى پشده‌ر(قه‌ڵا دزێ)له پاريزگاى سلێمانى ك له‌تى چه‌ك وه‌كار هاورياگه له‌بان جاڕيگ گه‌نم و ده‌رئه‌نجاميش كه‌سيگ كوشياگه‌و دووانيش زه‌خمدار بوينه.
وه‌ريه‌وبه‌رايه‌تى پۆليس راپه‌ڕين له به‌ياننامه‌يگ ئه‌را شه‌فه‌ق نيوز وت: هيزه‌يل پۆليس يه‌كسه‌ر ره‌سينه‌سه شوون روێداگه‌گه‌و چينه‌سه حاڵه‌ت ئنزار و هه‌وڵ ئه‌وه دانه كۆنترۆڵ وه‌زعه‌گه بكه‌ن له‌وه‌ر ئه‌وه‌گ زياتر په‌ره نه‌سينێد.
به‌ياننامه‌گه يه‌يش ده‌رخست ك كه‌سه كوشياگه ناوى(س.ع.ح) و زاينده‌ى ساڵ 1987 و پێشمه‌رگه بويه‌و هه‌ردوگ زه‌خمداره‌گه‌يش(أ.ع.ن) و زاينده‌ى ساڵ 1999 شوان په‌س و پووڵه بويه‌و خه‌ڵك ئاوايى خواران و زه‌خمدار دويه‌ميش(ر.ع.أ) زاينده‌ى 1984 و پێشمه‌رگه بويه‌و له خه‌ڵك ئاوايى ده‌شتيوان.
