كومه‌ڵه‌يگ مه‌ده‌نى خوازياره مقه‌يه‌تى له ده‌زگايه‌يل هه‌رێم بكريه‌ێد
2015-10-14T09:41:40+00:00
ئه‌و كومه‌ڵه له به‌ياننامه‌يگ ك(شه‌فه‌ق نيوز)ئاگادارى بوى، وت: حاڵ حازر هه‌رێم كوردستان وه بار سه‌ختيگ گوزه‌ر ئه‌كاو هه‌ڕه‌شه‌ى شيويان له ئاينده‌ى هه‌رێم ئه‌كا، چوينكه قه‌يران ئابوورى و گرفته‌يل سياسى كيشه‌ى گه‌ورايگه‌و هه‌ڕه‌شه له ئاشتى كومه‌ڵايه‌تى ئه‌كاو هه‌ر له‌وه‌ر ئه‌وه‌يش قووت مه‌ردم په‌يوه‌س كرياسه كيشه‌يل سياسى و كيشمه‌كيش ناونى حزبه‌يل و يه‌يش ئه‌دێده هووكار قويله‌وكردن فيشتر قه‌يرانه‌يل.
به‌ياننامه‌گه يه‌يش ده‌رخست و وت: ئه‌و تون وتيژيه‌يله ك روێدا له خوه‌ينيشانداينه‌يل هويچ مه‌هانه‌يگ ياسايى نه‌يرێد چ له‌لايه‌ن ده‌زگايه‌يل ئاسايشى چ له‌لايه‌ن حزبه‌يل و خوه‌ينيشانده‌ره‌يله‌و، هه‌ر وه‌و خاتريشه بايه‌سه مقه‌يه‌تى له ده‌زگايه‌يل حكومه‌ت بكريه‌ێد.
