كوردستان جواو راپۆرته‌گه‌ى وه‌خشين ناوده‌وڵه‌تى داره‌و
له‌ى باوه‌ته‌و، ديندار زێبارى سه‌رۆك ليژنه‌ى تايبه‌ت مه‌زه‌نه‌كردن و جواودانه‌وه له‌بان راپۆرته‌يل ناوده‌وڵه‌تى له حكومه‌ت هه‌رێم كوردستان له به‌ياننامه‌يگ ك(شه‌فه‌ق نيوز)ئاگادارى بوى، وت: ريكخرياگ وه‌خشين ناوده‌وڵه‌تى له راپۆرت ئمڕووى ئه‌و بڵاو كردگه ك هيزه‌يل پێشمه‌رگه وه هاوكارى ميليشيايه‌يل ئێزێدى ماڵ هاووڵاتيه‌يل عه‌ره‌ب ويران كردنه.
زێبارى ئاماژه وه ئه‌وه كرد و وت: ئێزيديه‌يل ميليشيات نه‌يرن و خاوه‌ن هيزيگن فه‌رمى سه‌ر وه وزاره‌ت پێشمه‌رگه‌و ئه‌ركه‌يليان مقه‌يه‌تيكردن ئێزيديه‌يله له كويه‌ى شه‌نگاڵ و له‌ناو ناوه‌ند شار شه‌نگاڵ و بڕيگيش له‌ليان ئه‌ركه‌يليان له به‌ره‌يل جه‌نگ دژ داعش جيوه‌جى ئه‌كه‌ن.
جى باسه، زێبارى هه‌ميش وت: قه‌يه‌غه‌كردن مه‌سه‌له‌ى گله‌وخواردن هاووڵاتيه‌يل عه‌ره‌ب ئه‌را ناوچه‌يليان ئه‌وه‌سه ك ئه‌و ناوچه‌يله هيمان خه‌ت قرمزه‌و ته‌ياره‌يل هاوپه‌يمان ناوده‌وڵه‌تييش تا ئيسه‌يش وه‌رده‌وام بوردمان ئه‌و ناوچه‌يله ئه‌كه‌ن و هه‌ر وه‌و خاتريشه وجوود مه‌ده‌نيه‌يل له‌و ناوچه‌يله گرفت ئه‌خاده په‌لامار هيز هاوپه‌يمانه‌يل دژ بنگه‌يل داعش و مه‌ترسييش دروس ئه‌كا له‌بان ژيان هاووڵاتيه‌يل مه‌ده‌نى و له وه‌ختيگيش ك هيزه‌يل پێشمه‌رگه وه‌خاتر دراوردن داعش روى كرده ئه‌و ناوچه‌يل عه‌ره‌بنشينه مه‌رم ئه‌و ناوچه‌يله شان وه‌شان چه‌كداره‌يل داعش دژ هيزه‌يل پێشمه‌رگه وسيان و يه‌يش بويه هووكار كوشيان بڕيگ له‌ليان و شماره‌يگيش له پێشمه‌رگه‌و ويرانكردن بڕيگ ماڵ ك له‌لايه‌ن داعشه‌و مينڕيژ كرياوين.
