قەیەغەی فرووشتن چەک لە هەولێر چوودە ئاست جیوەجیکردن
شەفەق نیوز/ ئومێد خۆشناو پارێزگار هەولێر، ئمڕوو پەنجشەممە، بەسیان شوینەیل فرووشتن چەک بی مووڵەت راگەیان، وئاشکرای دروسکردن دەسەیلیگ ئەمنی ئەرا مینەکردن ئی چەکەیلە کرد، و داوا لە هاووڵاتییەیل هەرێم کوردستان کرد لە هەڵمەت نیشتمانی بەشداری بکەن وچەک بی مووڵەت بیەنە دەس.
ئومێد خۆشناو لە کۆنگرەیگ رووژنامەوانی لەناو بینای پارێزگاگە وئاژانس شەفەق نیوز چەودیریی کرد وت: هەر لە ئیسەو دەسکریا قەیەغەکردن وبەسابن شوینەیل فرووشتن چەک، ودەسەیلیگ هاوبەش لە ناوخۆ و زێرەڤانی وپێشمەرگە و ئاسایش دروس کریا، تا خاڵ وەشکین دابنەن، و بکەفنە مینەی چەک بی مووڵەت، ودیاری کرد ک ئی هیزەیلە ئەرایان هەس مینەی چەک مووڵەتدار وبی مووڵەت لەهەر شوینیگ بکەن.
خۆشناو وتیش: هەمیش فەرمان وە پرسگەی خەسەخانەیل دریایە ریکار لەبان ئەوانەگ چەک بی مووڵەت هەڵگرن جیوەجی بکەن ودەس وەبانیان بنەن.
پارێزگار هەولێر هەمیش داوا لە هاووڵاتییەیل کرد هاوکاری حکومەت بکەن لە هەڵمەت نیشتمانی و چەک بی مووڵەتیان بیەنە دەس لایەنەیل پەیوەندیدار.
وەرجەیە، سەرۆک حکومەت هەرێم کوردستان فەرمان دادە وەزارەت ناوخۆ وە کارکردن لەبان بەسانن شوینەیل فرووشتن چەک بی مووڵەت، وداوای پاککردن کوردستان لەی چەکەیلە کرد وەپاڵپشتیکردن دادوەری لەی باوەتە.
