فەرماندەیگ پیشمەرگە: مەترسی داعش تەواو نەویە و هیمان هەڕەشەی هەرێم کوردستان دەێد
2023-06-22T11:30:27+00:00
شەفەق نیوز/ فەریق سیهاد بارزانی فەرماندەی هیزەیل پاڵپشتیکردن لە پیشمەرگە، ئمڕوو پەنجشەممە، دووپات کرد ک مەترسی ریخریاگ داعش هیمان وەردەوامە و هەڕەشەی هەرێم کوردستان دەێد.
ئەوەیش لە وتاریگ لە ئاهەنگ دەرچگن خول شەشەم لە هیزەیل پاڵپشتیکردن لە بنکەی ڕاهێنان هەولێر لە هیزەیل پیشمەرگەی کوردستان.
پەیامنێر ئاژانس شەفەق نیوز وت: شمارەی بەشداربویەیل لەی خولە ک تا ماوەی ٥٠ رووژ وەردەوام بوی، رەسیە ٣٠٠ ئەندام لە هیزەیل پاڵپشتیکردن، و راهێنانیان وەبان دەس ئەفسەریلیگ لە پیشمەرگە بردن، و هاوکاری هاوپەیمان ناودەوڵەتی.
فەریق بارزانی لە وتارەگەی وت: ئی ڕاهێنانە فرە گرنگە ئەرا بەرزکردن توانایل جەنگی هیزەیل پیشمەرگە، وتیش؛ مەترسی تیرۆر وە تایبەت ریخریاگ داعش هیمان هەڕەشەی هەرێم کوردستان دەێد.
هەمیش وت: هاوکاری وەگەرد هاوپەیمان ناودەوڵەتی ئەرا راهێنانیان سەربازی وەردەوامە، وەگەرد دابینکردن چەک ئەرا هیزەیل پیشمەرگە.
لە پەراویز ئاهنگەگە، فەریق سیهاد بارزانی ئەرا ئاژانس شەفەق نیوز وت: کار چاکسازی هیزەیل پیشمەرگە هیمان وەردەوامە وە سەرپەرشتیاریی حکومەت هەرێم کوردستان و هاوپەیمان ناودەوڵەتی.
دویاترین گامەیل هیزەیل هاوپەیمان ناودەوڵەتی پشتگیریکردن هیزەیل پیشمەرگە بویە وە بڕیگ چەک سووک و سەنگین، وەبی دیاریکردن شمارەی ئەو بڕەیلە.
