پشتگری بەرپرس جبهەی موتەحدی کورد لە شکایەت کردن لە (سەروک کومار ئێران)
شەفەق نیوز- دوماێ بڵاو بیینەوەێ هەواڵ شکایەت (عبداللە سوهرابی)، نوێنەر مەریوان دە دەور شەشم پارلمان ئێران لە سەروک کومار ئێران، بەرپرس بەرەی یەکگرتووی کورد (جبهەی متحد کورد)یش لە ئی کارە پشتگری کرد.
رەحیم فەرهمەند دە وت و وێژێگ وه‌ل شه‌فه‌ق نیوز وت: ئی رێ و رەوەنە ک ئاغای سوهرابی گرتگەسە وەر ئوو دادخوازی وە شێوەیێگی قانوونییە کارێگە مەدەنی و شایستەێ هەر ئایمێگ حەق‌خواز ک قانوون دناسێ.
بەرپرس جبهەێ موتەحد کورد وت: ئیجوورە کارەێلێ دبنە بایس یە ک لە یەو لا هەر کەسێ هات و کاندیداێ خوەێ کرد ئەڕا سەروکایەتی یا نوێنەرێ پارلمان و شەوراگان شار و دێ، ویرێ وە قسەێلێ ببێ ک وادەێل درووکانی یا بێ‌دەرئەنجام وە خەڵکەگە نەدەێ ئوو ئەڕا دەنگ و رای کووەو کردن کلگ نەنێ دە مل ویر و هەستەێل وڵاتوەندەێلە و نەخوازێ ک وە شوعار فریوێیان بدەێ.
ئەوی وت: م ئی شکایەت کردنە دە هنازەی بڕیارنامەێلەێ ئاغای کەڕووبی و ئاغای رووحانی ئەڕا سەروکایەتی دزانمەێ ک وادە دان پەیجووری فرەترێ ئەڕا داین بەش و ماف کەمهووزەێل ئێرانی بکەن.
فەرهەمەند وت: چنجگ ئی کارە دە دانیشتنەوەێ 62 کەس لە چالاکەێل کورد ک دە ماڵ ئاغای عەزیزی دە کرماشان یەکا گرتیمن چکیا ئوو ئەوان دیاریێ کردن و نان دە مل ئیمە ک گرووپێ چەن‌کەسە بیمن؛ خوەم ک بەرپرس جبهەی موتەحد کورد بیم وەرد ئاغایان حەیاتی ئوو کەماڵ ئازادمەنش و موحەمەدسدیق کەبوودوەند ئوو خێزانەگەێ وەگەرد بڕێ تر ک دوماێ ئەوە هە گەشە وەێ کار و وەێ جەرخە دریا ئوو دە یانزەهمین دەورەێ ئنتخابات سەروکایەتی دە ئێران وە شوونگیری بڕ فرەیێگ لە کوردەێل تێهران، کریا وە بڕیارنامەیێگ و گشت وەگەرد ئاغای رووحانی واژۆوێ کردن بەشکەم ببێگە بەڵگەنامەیێگ دیاری ئەڕا بانان ئێران.
ئەوی دە دوماقسەگەێ وت: وەداخەوە ئێسە ک دەورەێ سەروکایەتی رووحانی پەسا تەواو دبێ دبینیمن ک ئەوی و دەوڵەتەگەێ ویر لەو چوارچووە نەکردن و وادەێلەگەیان لە یادێیان چگ ئوو ئی شکایەتە خوەێ تاریخ‌سازیێ‌ترە دە دەم و دەزگاێ قەزا و دادەوەری ئێران و پروسەێل ئنتخاباتی دە ئێران، دوفێشتر لە چەمسار حەق‌خوازی و بەش‌خوازی کەمهووزەێل ئێرانی لە بەرپرسەێل ئوو سەروکەێل و کەسایەتییەێل ئێران و جی شانازییە ک کوردێک ک پێشەکاری نوێنەری دە پارلمان ئێرانیش دیرێ ئوو خوەێ قانوون‌ناسە ئی رەوەنە کردگەسە باو و هیوادارم هە وەیجوورە وە ئەفزار قانوون، چالاکەێل کورد بەش‌خوازی بکەنە باو ئەڕا خوەیان.
