پێشانگای ناودەوڵەتی سلێمانی ئەرا کتاو سوو وە بەشداریکردن پەیمانەیی ٩٠٠ دەزگای چاپکردن واز بوود
شەفەق نیوز/ شار سلێمانی ئامادەکاریی تەواو کرد ئەرا میوانداریکردن چاپ شەشەم پێشانگای ناودەوڵەتی کتاو کە وە یەکیگ لە دیارترین بوونەیل رووشنهویری ناوچەگە دانریەێد.
دووسەیل خوەنستن و کتاو چەوەڕی کەن سوو پەنجشەممە، پێشانگاگە لە گۆڕەپان پێشانگە ناودەوڵەتییەیل تاسڵوجە، وە بەشداریی پەیمانەیی دەزگایل چاپ و بڵاوکردن نیشتمانی و عەرەبی و بیانی دەسوەپی بکەێد.
حەسەن ڕەحیم، وەڕێوەبەر گشتی پێشانگای ناودەوڵەتیی کتاو سلێمانی لە بەیاننامەیگ رەسیە ئاژانسی شەفەق نیوز وت: سوو پەنجشەممە، شەشەمین خول پێشانگاگە دەسوەپی کەێدر و دووپاتیش کرد کە ئی بوونە روشنهویریە قەوارەی خوەی چەسپانیە جویر یەکیگ لە خاسترین پێشانگایل لە مەیدان عەرەبی.
ڕەحیم وتیش: پێشانگاگە بەشداریکردن زیاتر لە ٩٠٠ دەزگای چاپ و بڵاوکردنە لە ١٣ وڵاتەو وەخوەی دوینێدر کە زیاتر لە ٥٠ هەزار ناونیشان هەمەچەشن پیشکەش کەن کە بوارە جیاوازەیل رووشنهویری و زانستی گرێدەو، یەیش ڕەنگدانەوەی هەمەجویریی کولتووری فراوان و بەهای سەنین جیاوازە ئەرا سەردانکەرەیل.
وتیش: پێشانگاگە تا ماوەی ١١ رووژ وەردەوامە، لە ٢٨ تشرین دویەم تا ٨ کانوون دویەم ٢٠٢٤، و رووژانە لە ساعەت ١٠ی شەوەکی تا ٦ ئیوارە پیشوازی لە سەردانکەرەیل کەێد.
مەزەنە کریەێد پێشانگاگە لەننو کەشیگ کولتووری جیاواز بەشدارییگ فرە وەخوەیەو بوینێد.
پێشانگای ناودەوڵەتی سلێمانی ئەرا کتاو یەکیگە لە دیارترین بوونەی کولتوورییە ساڵانەیەیل هەرێم کوردستان، کە یەکەم دانیشتنەیلی شەش ساڵ وەرجەیە وە ئامانج وەرنوابردن رووشنهویری و خوەنستن و کاڵدان ئاڵوگۆڕ فیکری ناوەین نویسەرەیل و بڵاوکەرەیل سەرتاسەر جیهان دروس بوود.
