شاند هەرێم کوردستان لە بەغداد.. رووشنایی سەوز ئەرا چارەکردن گشت گیچەڵەیل
شەفەق نیوز/ سەرچەوەیلیگ تایبەت، ئمڕوو دووشەممە، ئاشکرا کردن کە رووشناییگ سەوز هەس ئەرا چارەکردن گشت گیچەڵەیل و باوەتەیل گیرهاتگ ناوەین حکومەت هەرێم کوردستان و حکومەت فیدڕاڵی.
ئەو سەرچەوەیلە ئەرا ئاژانس شەفەق نیوز وتن: شاند هەرێم کوردستان کە سەردان بەغداد کەێد، ئمڕوو چەوی کەفێدە حکومەت فیدراڵی ئەرا یەکلاییکردن فرەی پرسە گیرهاتگەیل و گرنگترینیان مووچەی فەرمانبەرەیل هەرێم کوردستان، و هەناردەکردن نەفت و داهاتەیلی، وەگەرد رەفتار بانان وەگورەی ریکارەیل هەشمارکردن داهاتەیل دارایی دەوڵەت، وە خشتەیل فەرمی ئاشکرا.
وتیش؛ باوەت دراوردن و هەناردەکردن نەفت وەشیوەیگ سەرتایی رێککەفتن لەبانی کریەێد، وەشیوەیگ مسۆگەر هەناردە و داهاتەیلی بکەێد وەگورەی ریکارەیل کۆمپانیای (سۆمو) ئەرا هەناردەی نەفت وەگورەی نرخ دیاریکریای.
سەرچەوەیل وتنیش؛ وەلێ وەو رێککەفتنە کار نیەکەن مەگەر دویای باسکردنی لە گردەوبوین هەفتانەی ئەنجومەن وەزیرەیل و دەنگدان لەبانی لە خود گردەوبوین.
ئیوارەی یەکشەممە، شاند هەرێم کوردستان وە سەرۆکایەتی ئاوات شێخ جەناب وەزیر دارایی و ئابووری لە هەرێم کوردستان، رەسیە بەغداد پایتەخت، ئەرا دانوسەنین لە پرسە گیرهاتگەیل ناوەین هەولێر و بەغدا وەتایبەت راسەوکردن یاسای بودجە.
کوردستانیەیل ئومیدیگ دیرن دویای سەردان نێچیروان بارزانی سەرۆک هەرێم کوردستان ئەرا بەغداد پایتەخت، و چەوکەفتنی وە شمارەیگ لە وەرپرسەیل حکومەتی و حزبی، و دیدارەیلی وەرد هاوپەیمانی ئیدارەی دەوڵەت، ئەرا پەیاکردن چارەسەریەیل گونجیاگ ئەرا باوەتەیل گیرهاتگ دیارترینیان قەیران مووچەی فەرمانبەرەیل.
نێچیروان بارزانی، لە سەردانەگەی کە رووژ یەکشەممەی گوزەشتە دەسوەپی کرد، لە رووژ سێشەممە تەواو بوی، لە گردەوبوین هاوپەیمان وەڕیەوبردن دەوڵەت بەشداری کرد وە ئامادەبوین محمد شیاع سودانی سەرۆک وەزیرەیل، و مەحمود مەشهەدانی سەرۆک پەرلەمان و وەرپرسەیل ترەک، و هاوپەیمان وەڕیەوبردن دەوڵەت دووپات کرد کە هویچ هەڵوێستیگ سیاسی لە پرس مووچەی فەرمانبەرەیل هەرێم کوردستان نییە، مەگەر تەنیا کارەیل پیشەیی هەی کە توانای رەسین ئەرا شیوەی چارەسەرییان هەس، لەڕی گفتوگۆ و لەیەکفامسنن، دویر لە سەکووەیل پەرەسەنین راگەیانن.
وەگەرد سەرەتای ساڵ 2025، قەیران مووچەی فەرمانبەرەیل وەردەوامە وە قسەوباس و نیگەرانی خەڵک، کە ئی کارە بویە گەوهور پەڵپەیل مەردم ئەرا چارەکردنی وەشیوەیگ ریشەیی.
