شاند كورد وه سه‌رۆكايه‌تى تاڵه‌بانى گفتگووه‌يلى له‌به‌غدا وه ديدار باڵيۆز ئه‌مريكا ده‌سوه‌پيكرد
شه‌فه‌ق نيوز/ ده‌مه‌و شه‌وه‌كى ئمڕوو، شاند حكومه‌ت هه‌رێم كوردستان، ده‌سكرده زنجيره دانيشنه‌يليگ له به‌غدا، ئه‌ويش وه ديدار باڵيۆز ئه‌مريكا ده‌سوه‌پيكرد.
له‌ى باوه‌ته‌و يه‌كيگ له ياوه‌ره‌يل شانده‌گه ئه‌را شه‌فه‌ق نيوز وت: ئى دانيشتنه‌يله دوياى ديدار وه‌ل باڵيۆز ئه‌مريكا له به‌غدا، دانيشتنيگ گرنگ وه‌ل سامر غه‌زبان وه‌زير نه‌فت جيگر سه‌رۆك وه‌زيره‌يل ئه‌گرێده خوه‌ى له‌وه‌ر تاوتويكردن چه‌ن مه‌سه‌له‌يگ چاره‌سه‌رنه‌كرياى له‌ناونى به‌غدا و كوردستان و دوسيه‌ى مووچه‌ى كارمه‌نده‌يل هه‌رێم.
وه‌ل ئه‌وه‌يشا شانده‌گه چه‌ويشى ئه‌كه‌فێده مسته‌فا كازمى سه‌رۆك حكومه‌ت راسپارياى و دوياى ئه‌وه‌يش ديداريگ وه‌ل سه‌رۆك ئه‌نجومه‌ن نوێنه‌ره‌يل و ديداريگيش وه‌ل عه‌مار حه‌كيم سه‌رۆك ره‌وت حكمه و دوياجاريش ديداريگ وه‌ل نورى مالكى سه‌رۆك ئئتلاف ده‌وڵه‌ت ياسا ئه‌نجام ئه‌ياد.
جى باسه، سه‌مير هه‌ورامى قسه‌كه‌ر وه‌ناو نويسينگه‌ى تاڵه‌بانى له لێدوانيگ ئه‌را شه‌فه‌ق نيوز وت: ئامانج له‌ى سه‌ردانه له‌وه‌ر وه‌رده‌وامى دانيشتنه‌يل وه‌رينه ك له‌لايه‌ن شاند حكومه‌ت هه‌رێم وه‌ل حكومه‌ت ناوه‌ندى ئه‌نجام دريان وه‌خاتر چاره‌سه‌ركردن ناكووكيه‌يل و كيشه‌يل ناونى هه‌ولێر و به‌غدا.
