سێشەممەی ئایندە.. گردەوبوینیگ گرنگ ناوەین بەغداد و هەولێر لەباوەت هەناردەکردن نەفت و مووچەیل

شەفەق نيوز- بەغداد  

ئیخڵاس دلێمی جیگیر سەرۆک کەسەی دارایی لە پەرلەمان عراق، ئمڕوو یەکشەممە، ئاشکرای گردەوبوینیگ یەکلاییکەر کرد کە دویای دوو رووژ ناوەین دەسەیل هەرێم کوردستان و بەغداد وەڕیەو چوود، لەباوەت میکانیزم دووارە هەناردەکردن نەفت هەرێم کوردستان.

ئیخڵاس خان ئەرا ئاژانس شەفەق نیوز وت: رێککەفتن نەفتی ناوەین حکومەت فیدڕاڵی و حکومەت هەرێم کوردستان وەردەوامە، و دەسەیلیگ هاوبەش ناوەین وەزارەت نەفت فیدڕاڵی و وەزارەت سامانەیل سروشتی هەرێم کوردستان، و لە رووژ سێشەممەی ئایندە گردەوبوین یەکلاییکەر وەڕیەو چوود.

وتیش: گردەوبوین هاوبەش ناوەین دەسەیل ئەوەسا میکانیزم دووارە هەناردەی نەفت هەرێم کوردستان و وەرگردن داهاتەیل نەفتی و مەرەقەزکردن مووچەی فەرمانبەرەیل مانگ گوزەشتە دیاری کەێد.

دیاری کرد کە گردەوبوینەگە هەناردەی 220 هەزار بەرمیل و وەرگردن داهاتەیلی ئەرا خکەمەە فیدڕاڵی دیاری کەێد، و دویای ئەوە حکومەت فیدراڵی مووچەی فەرمانبەرەیل هەرێم کوردستان کلکەێد کە رەسێدە 960 مليار دينار مانگانە.

وەرجەیە، مەسرور بارزانی سەرۆک حکومەت هەرێم کوردستان، دووپاتکردنی دووارەو کرد کە حکومەتگەی ئامادەس ئەرا رادەسکردن نەفت ئەرا حکومەت فیدراڵی وەرانەور دابینکردن مووچەیل وەبەش هەرێم کوردستان لە بودجەی دارایی ساڵانە، و داوا لە بەغداد کرد کۆتایی وە سزای وەکۆمەڵ و رەفتارەیل نایاسایی و نادەستووری وەرانوەر گەل کوردستان بارێد.