سیستەم وەرگری ئاسمانی ئەمریکی درۆنیگ لە ئاسمان هەولێر خەێدە خوارەو.. ڤیدیۆ

شەفەق نيوز/ سەرچەوەیگ ئەمنی، شەفەق ئمڕوو دووشەممە، خەوەردا کە وەرگری ئاسمانی قونسوڵخانەی ئەمریکا لە هەولێر، درونیگ خستە خوارەو مەزەنە کریەێد ئیرانی بوود.

سەرچەوەگە ئەرا ئاژانس شەفەق نیوز وت: وەرگری ئاسمانی ئەمریکا، ئەو فڕۆکە دویای رەدبوینی لە نزیکیەو خستە خوارەو، و کەفتە ناو کۆمەڵەیگ نیشتەجییوین پەسا دروس کریەێد نزیک جادەی هاوینەهەواری سەڵاحەدین.

دویەکە یەکشەممە، وەرگری ئاسمانی ئەمریکی درۆنیگ خستە خوارەو لە رویداوەیگ هاوشیوە لە ئاسمان هەولێر وەبی توومارکردن زەرد.

ئەوەیش وەگەرد رەدبوین بڕ نوویگ لە مووشەکەیل ئیران وەبان ئاسمان عراقەو وەرەو ئیسرائیل هات.