سەرۆک و سەرۆک حکومەت هەرێم پیرووزبایی وە ساڵیاد دامەزریان یەکێتی مامووستایل کوردستان کەن
نێچیروان بارزانی لە بەیاننامەیگ رەسیە ئاژانس شەفەق نیوز وت: پیرووزبایی لە شەس و یەکەمین ساڵیاد دامەزریان یەکێتی مامووستایل کوردستان لە نویسینگەی سکرتێری یەکێتی مامووستایل و گشت مامووستایل کوردستان کەم، و ئومید سەرکەفتن ئەرایان خوازم.
وتیش؛ لەی ساڵیادە وە بەرزی و رێز و سوپاس نرخدار خەبات و رەنج پیرووز مامووستایل کەم ئەرا ئامادەکردن نەوەیل و قوربانییان و تەقەلا و رەنج پەروەردەییان لە رووژەیل خەبات لە شاخەیل و لە رووژەیل ئازادی.
دیاری کرد ک مامووستایل مەشخەڵ و ستوین سەرکیین ئەرا ئامادەکردن نەوەیل و پەروەردە و فێرکردن، و کاریگەری راستەخۆ لە بیناکردن و گەشەوەپیدان توانای کەسایەتی خوەنەوارەیل، ئەراوە ئەرک گرنگ و پیرووزیگ جیوەجی کەن، شایستەی گشت رێز و دەسخوەشیە.
بارزانی لە کۆتایی بەیاننامەگەی وت: لەی ساڵیادە دووپات لە پشتگیریکردنمان ئەرا گشت ماف و داوایل مامووستایل کەیمن، و وەرێزیگ یاد هەڵوێست ئەو مامووستایل دڵسووزە کەیمن ک لە گشت رەوشە سەختەیل تەقەلا دان وەبی وسیان کار پەروەردە و فێرکردن. سڵاو لەو مامووستایلە ک گیانیان کردنە
قوربانی ئازادی گەل و نیشتمانیان، پیرووز بوود ساڵیاد دامەزریان یەکێتی مامووستایل کوردستان.
لەلای خوەییش، مەسرور بارزانی سەرۆک حکومەت هەرێم کوردستان، پیرووزبایی وە ساڵیاد دامەزریان یەکێتی مامووستایل کوردستان کرد.
مەسرور بارزانی وت: وەبوونەی شەس و یەکەمین ساڵیاد دامەزریان یەکێتی مامووستایل کوردستان، گەرمترین پیرووزبایی لە سەرۆک یەکێتی مامووستایل و ئەندامەیل نویسینگەی سکرتێری و گشت مامووستایل کوردستان پیشکەش کەم، وەگەرد ئومیدمان وە وەردەوامی سەرکەفتن ئەرا گشتی.
وتیش: یەکێتی مامووستایل کوردستان دەور دیاریگ و خەبات پرشنگداریگ لە بزووتنەوەی ئازادیخوازیی گەل کوردستان پیشکەش کرد، و هەمیشە لە نوای ئەوانە بوین ک وەرگری لە ماف گەلەیل کەن، و رەنجدەر بوین ئەرا مقەیتیکردن ماف مامووستایل.
بارزانی وتیش: وەی بوونە، بەرزترین سوپاس و رێز و لەو دەورە کەیمن ک ماموستایەیل کوردستان جیوەجیی کردن، لە ماوەیلیگ جیاجیا و سەخت، لە وەردەوامی ئەرک پیرووزبایان.
لە کۆتایی وتیش: ئومید خوازیمن ماموستایەیل کوردستان لە ئەرک گرنگیان وە سەرکەفتن وەردەوام بوون، ئەرا ئامادەکردن نەوەیگ نیشتمانپەروەر و بەهرەدار، ئەرا هاوکاری لە پیشکەفتن کوردستان و گەشەکردنی لە جویراجویر چینەیل و وەهاوکاری گشتی.
