سەرۆک هەرێم کوردستان: ئەوەگ لە لوبنان و غەززە بوی پرس نەتەوەییگە وە جەنگ ویران نیەکریەێد
شەفەق نیوز/ نێچیروان بارزانی سەرۆک هەرێم کوردستان، ئمڕوو چوارشەممە، وت: ئەوەگ لە لوبنان و کەرت غەززە بویە پرس نەتەوەیگە، هەرچەگ بوود وە جەنگ ویران نیەوود.
نێچیروان بارزانی لە دانیشتن گفتوگۆ لە کۆڕبەند هەولێر وە چاپ سێیەمی وە ناونیشان نیگەرانی کەڵەکەبوی لەبان بانان خوەرهەڵات ناوڕاس وت: ئەوەگ لە غەززە و لوبنان بوود پرسیان لەناو نیەێد، دووپاتیش کرد کە گەلەیل وە جەنگ نیەشکیەنەو، بەڵکم زیان رکداریی وە گردن مافیان زیایەو کەێد.
نێچیروان بارزانی وتیش: ئیمەی کوردیش پرس خوەمان دیریمن، و کەفتیمنە وەر جویراجویر کوشتن و بڕین و ویرانکاری، کەفتیمنە وەر چەک کیمیایی، ئاوایەیلمان ویران کریان، وەلێ نەفەوتیایمن، چوینکە ئیمە خاوەن پرسیمن، و هەرکەسیگ پرسیگ راسگانی داشتوود وە ئاسانی لەناوی نیەیریەێد.
نێچیروان بارزانی وتیش: سەرکەفتن سەربازی بەس نییە لە غەززە و لوبنان، ئەگەریش ئیسرائیل وت سەرکەفتن سەربازی وەدەس هاوردگە، وەلێ هەناێ کریەێدە سەرکەفتن سیاسی، و پشتبەسین وە چارەی سەربازی تەنیا، ئەنجامەیل بەدیگ تیەرێد نەک تەنیا لەبان خوەی، بەڵکم لەبان گشت ناوچەگە، تەنانەت لەبان ئەمریکایش.
نێچیروان بارزانی لە کۆتایی وتیش: گرنگ ئەوەسە عراق و هەرێم کوردستان لە کاریگەرییەیل ئی رەوشەیل ئاڵووزە دویرەو بخریەن، و دەسخوەشی لە تەقەلایل سەرۆک وەزیرەیل عراق و فەرماندەی گشتی هیزە چەکدارەیل محمد شیاع سودانی کرد، چوینکە کەموکوڵی لە کارکردن ئەرا مقیەتیکردن ئارامی عراق و هەرێم کوردستان لە سای ئی رەوشەیلە نەکرد.
