سەرۆک هەرێم کوردستان نیگەرانە لە ئاڵشتکاری یاسای بودجە و داوای پابەندی وە رێککەفتن کەێد
بڕیارە لە دانیشتن ئمڕوو شەممە، پەرلەمان عراق دەنگ لەبان رەشنویس یاسای بودجە بیەێد.
نێچیروان بارزانی لە بەیاننامەیگ وت: "ئی گامە ریگرییگ خەێدە بان ری ئەو یاسای بودجەی گشتیە، ک عراقیەیل وە ئومیدیگ چەوەڕی پەسەنکردنی کەن تا سێ ساڵ ئایندە".
وتیش: "پابەندبوین وە ڕێکەفتن سیاسی هاوپەیمانی ئیدارەی دەوڵەت بنەمای ئارامی ئەمنی و سیاسیە ئەرا عراق، هەرلیوا، گامیگ دروسە وەرەو ئایندەیگ خاستر ئەرا وڵات و گشت پێکهاتەیلی. وەپشتسەرنان لەیەکڕەسینەوە و ڕێککەفتن و تەقەلا ئەرا پێشێلکردن مافە دەستووریەیل هەرێم کوردستان رەفتاریگ نشان دەێد ک وەتەواوی پیچەوانەی وەرپرسیاریەتی نیشتمانییە و بیجگە لە نائومیدی و شیوانن ئاشتی هیچیگتر بەرهەم نیەتیەرێد، نا ئارامی سیاسی وڵات، و زەرەد وەگشت عراق رەسنێد."
بارزانی هەمیش وت: لە گوزەشتە و ئەزموونمان ئەوە چەسپانیە ک رەفتارکردن وەزوان زوورکاری و زۆرینە و کەمینە، و پێشێلکردن ماف و شایستەیی پێکهاتەیل عراق، هەرگیز ئاسایش و ئارامی ئەرا وڵاتەگە وەدەس نیەتیەرێد و نیەوەێدەی وەردەم، ئەراوە بانگەواز گشت لایەنەیل کەیمن، وەتایبەت لایەنەیل هاوپەیمانی ئیدارەی دەوڵەت، پابەند وە ڕێککەفتنەیل بوون و تا گشتمان لەبان ئاست وەرپرسایەتی مامەڵە بکەیمن بایەتە لایەنەیل کوردی یەکبگرن و یەکبگرن لە وەرگریکردن لە مافەیل دەستووریمان."
وتیش: "دووپات کەیمن ک هەرێم کوردستان جویر هەمیشە ئامادەس ئەرا چارەسەرکردن گشت گرفتەیل لە بنەمای دەستوور، و ئەزموون ئی چەن مانگ دویاییە لە کار هاوبەش و لەیەکڕەسینەوە و گامەیل ناوەین هیز و لایەنە عراقیەیل، و کارکردن وە رێککەفتن دروسکردن حکومەت فیدراڵی، مایەی رەزامەنی خەڵک عراق و دووسەیلیان بوی، ئەراوە بایەتە ئی رویکردنە قایمتر بکریەێد و ری نەیریەێد وە کەسەیلیگ تا ڕێککەفتنەیل بشیونن و رەوشەگە ئاڵوزتر بکەن".
