سەرۆک هەرێم کوردستان لە ساڵیاد راپەڕین ئادار: فرەتر لە هەر وەختیگ گوزەیشتە یەکێتی رزەگە خوازیمن
شەفەق نیوز/ نێچیرڤان بارزانی سەرۆک هەرێم کوردستان، ئمڕوو جمعە، سییەم ساڵیاد راپەڕین ئادار گەل کوردستان دژوە رژیم سەدام حسێن یاد کرد.
بارزانی لە بەیاننامەیگ وت: سڵاو ئەرا گەل کوردستان خۆڕاگر وە گشت پێکهاتەیلی، لەی جوو رووژیگ وەرجە سیی ساڵ، ک لە رانیەی خوەشەویست دەروازەی ڕاپەڕینەگە دەس وەپیکرد، لە جوولەی جەماوەری مەزنیگ دژوەی ستەم و دیکتاتۆریەتە، شان وەشان پێشمەرگەی پاڵەوان کوردستان، و ئاوای و شارەیل وڵاتەگە یەک لە شوون یەک رزگار کردن.
وتیش؛ ئمڕوویش، هەنای ساڵیاد ئەو رووژەیل پیرووزە و پاڵەوانەیلی زنیەو کەیمن، کوردستان لە هەر وەختیگ گوزەیشتە ژیار گەلەدەسی و یەکێتی رزەیل گشت لایەن و پێکهاتەیل خوازێد، تا بتوێتێد مەقەیەتی لە پەیام و ئامانجەیل پیرووز راپەڕینەگە و بەرهەمیل خوین شەهیدان بکەێد، و وەرەو دویارووژیگ خاستر بچیمن.
وتیش؛ وەو جوورە گشت کوردستانیەکان وە پێکهاتەیل نەتەوەیی و ئاینییان و وەگشت بۆچوون و هێز و لایەنەیل سیاسییان لە راپەڕینەگە وەیەک بەرە گردەو بوین، و راپەڕیمن و سەرکەفتیمن، و ئیسەیش وەگەرد یەکەو توانای نواگردن سەختیەکان دیریمن، و مافە دەستووریەکان خوەمان وەدەس باریمن و مقەیەتیبان بکەیمن.
بارزانی هەمیش وت: لەی ساڵیاد پیرووزە، بانگواز ئەرا گشت هێز و لایەن و پێکهاتەیل کوردستان کەم، ساڵیاد راپەڕینەگە بکەنە ناووک پاڵپشتی و کەلەدەس و یەکێتی رزەگە و کۆتایی هاوردن وە گرفت و ناکۆکیەکان، ئەرا دڵخوەشکردن گیان کاروان شەهیدەیل کوردستان، و وەگەرد یەکەوە وەرەو دویارووژیگ خاستر بچیمن، و لە خەباتکاری وەیەکەو ئەرا کوردستانیگ ئارام و ئاوەدان ک هەمیشە جوور هەرویلیکیگ و باوەشیگ ئەرا ئازادی و ئاشتەوایی و پێکەوەژیان بمینێد.
