سەرۆک هەرێم کوردستان پیرووزبایی وە رووژ رووژنامەوانی کەێد
شەفەق نیوز/ نێچیرڤان بارزانی سەرۆک هەرێم کوردستان، ئمڕوو پەنجشەممە، پیرووزبایی لە رووژنامەوانیەل کورد لە ١٢٣ مین و ٢٣ مین ساڵیاد دامەزرانن سەندیکای رووژنامەنووسەیل کوردستان کرد.
بارزانی لە بەیاننامەیگ وت: دووپاتی لە پشتگیریکردن تەواوەتی خوەمان ئەرا رووژنامەنوویەیل کەیمن و باوەڕی چەسپیاگمان وە ئازادی رووژنامەوانی وباسکردن جوور یەکیگ لە بنەما سەرکیەکان هەر کۆمەڵگایگ دیموکراتی ئازاد.
وتیش؛ دابینکردن ژینگەی ئارام وگونجیاگ و هاندەر ئەرا رووژنامەنووسەیل و مسۆگەرکردن رەسینیان ئەرا سەرچەوەیل زانیاریەکان و بڵاوکردنی دویر لە هیچ ریگرییگ، خوەی هیلێدەی ئەرک هووشیارکردن رای گشتی و ئەرک چەودیریکردن لەبان کار دامەزراوەیل جیوەجی بکەێد، وەو شیوە ک بیلێدەی بوودە هووکار گورجیگ لە بیناکردن و ئەوزەڵکردن دیموکراتی و کۆمەڵایەتی.
وتیش؛ چەوەڕی لە رووژنامەوانیەیل کەیمن ئەرکەیلیان وە وەرپرسایەتی و پیشەیی جیوەجی بکەن، وەگەرد چەودیریکردن یاساکان و رەوشت کار راگەیانن و پەیمانە ناودەوڵەتیەکان وکار وەڕاسگوی، وە سەنگینی و یەکچەوەکی، و مقەیەتیکردن ئاشتی کۆمەڵایەتی و ئارامی سیاسی و بەرژەوەندیە باڵاکان گەل و وڵات بخەنە وەرچەو، و بایەدە وەگورەی یاسای رووژنامەوانی لە کوردستان رەفتار وەگەرد پێشێلکاری لە چین رووژنامەوانی بکریەێد.
هەمیش دەسخوەشی لە دەور دامەزراو و رێکخراوە ناودەوڵەتی ووناوخۆییەیل کرد ک وە راسگوی و ئەمانەتی چەودیری لە ئازادی رووژنامەوانی و باسکردن لە هەرێم کوردستان کەن، و ئەرزشدار راپۆرتەیلیان کەیمن ک دەسمیەتکارە ئەرامان و بەڵەیمان دەێد تا زەمینەی ئازادی قایم بکەیمن و مقیەتیی بکەیمن.
وەلی سەرۆک هەرێم کوردستان باس لە نیگەرانی قویل خوەی کرد لە سیمایگ ناشرین و زوانیگ لە ئاست نزم ک وەداخەو لە چەن شوونیگ راگەیانن و ماڵپەڕەیلیگ پەیوەندیە کۆمەڵایەتیەکان لە کوردستان زاقەو بوی، ک خوەی زوانیگە دویر لە ئەرزش و رسوومەیل کۆمەڵگای کوردستانی و مێژوو و کەلتوور سەنگین ئەرا رووژنامەوانی کوردی ودویرە لە گشت بنەمایل رووژنامەوانی، و بایەتە وو تەقەلای گشت لایەنەیل سنووریگ ئەرا ئەو سیما بنریەێد و لای بووریەێد.
وتیش؛ هەست وە خوەشحاڵی کەیمن وە بڕیار پەرلەمان کوردستان ک رووژ ٢٢ نیسان جوور رووژیگ فەرمی ئەرا ئاهەنگ وە رووژنامەوانی کوردی دانا، و وەی بۆنە سڵاو لە شازادە موقداد مەدحەت بەدرخان دێرین رووژنامەنووسەیل کەیمن ک ژیان و پیشەی خوەیان ئەرا ئازادی و پێشکەفتن گەلەگەیان تەرخان کردن وگیان خوەیان خستنە بان ری رەسانن راسیەگە و گەشەکردن رووژنامەوانی کوردی، ئومیدخوازم لە بۆنەیل هاتگ لەسای رەوشەیلیگ خاستر ساڵیاد ئی بۆنە بکەیمن.
