سەرۆک هەرێم کوردستان پیرووزبایی یاد لەداڵگبۊن پەیغەمبەر کەێد و داوا ئەرا پاڵپشتیکردن وەیەکەوژیان و نووەوکردن پابەندبۊن وە بەها بەرزەیل کەێد

شەفەق نیوز - هەولێر

نێچیرڤان بارزانی،  سەرۆک هەرێم کوردستان، ئمڕوو سێشەممە، پیرووزبایی لە گشت موسڵمانەیل کوردستان و عراق و جەهان وە یاد لەداڵگبۊن پەیغەمبەر کرد، وە داواکردن ئەرا قایمکردن وەیەکەوژیان و نووەوکردن پابەندبۊن وە بەها بەرزەیل.

 سەرۆک نێچیرڤان بارزانی، لە بەیاننامەیگ وەی بونەو وت "ئومیدخوازم ئی یاد پیرووزە وەگەرد خوەی خێر و خوەشی و ئاسایش و ئارامی ئەرا گشت لایگ بارێد، و بوودە هاندەریگ ئەرا قایمکردن گیان برایەتی و وەخشین و وەیەکەوژیان ئاشتییانە ناوەین گشت پێکهاتەیل".

وتیش "با ئی یاد پیرووزە بکەیمنە دەرفەتیگ ئەرا نووەوکردن پابەندبۊن وە پەیام پەیغەمبەر و رێنماییەیل و بەها بەرزەیلی لە بڵاوکردن خێر و دادپەروەری و ئاشتی و مرۆڤایەتی، تا وەگەرد یەک وەرەو بانانیگ زیاتر سەقامگیر و ئارام بچیمن".