سەرۆک حکومەت هەرێم کوردستان داوا لە مەسیحیەیل گەێد ئەرا هەرێم گلەو بخوەن
![سەرۆک حکومەت هەرێم کوردستان داوا لە مەسیحیەیل گەێد ئەرا هەرێم گلەو بخوەن](https://media.shafaq.com/media/arcella/1626531342618.jpg)
شەفەق نیوز/ مەسرور بارزانی سەرۆک حکومەت هەرێم کوردستان، ئمڕوو شەممە، داوا لە مەسیحیەیلەی دەیشت کرد ئەرا میلیکانیان گلەو بخوەن و خزمەت هەرێم بکەن، و پەیمان وە دابینکردن گشت ئاسانکارییگ ئەرا گلەوخواردنیان و مقەیەتیکردن مافەیلیان دا.
سەرۆکایەتی هەرێم لە بەیاننامەیگ رەسیە ئاژانس شەفەق نیوز وت: مەسرور بارزانی سەرۆک حکومەت هەرێم کوردستان، ئمڕوو، پیشوازی لە لویس ساکو بترێرک کلیسەی کلدانی لە عراق و جهان وەگەرد شاند یاوەری کرد.
و دیاری کرد بترێرک کلیسەی کلدانی لە عراق و جهان لە چەوپیکەفتنەگە دەسخوەشی وە ئەزمون خوەشەویستی و پێکەوەژیان لەناونی جووراجور پێکهاتەیل هەرێم کوردستان کرد، وە وەخاسی ئەوە بویە نموونەیگ ئەرا خوەشبوین و مقەیەتیکردن ماف پێکهاتەیل لە ناوچەگە.
هەرلیوا؛ سەرۆک حکومەت جەخت لەبان گرنگی بتەوکردن کەلتور پێکەوەژیان و تیکڵابوین ناونی پێکهاتەیل ئاینی و نەتەوەیی لە هەرێم کوردستان و عراق کرد، و داوا لە مەسیحیەیلەی دەیشت کرد وەرەو میلیکانیان گلەو بخوەن و خزمەت کوردستان بکەن.
بارزانی هەمیش دووپات کرد ک حکومەت هەرێم کوردستان ئەوەسا گشت ئاسانکارییگ ئەرا گلەوخواردنیان و مقەیەتیکردن مافەیلیان دابین کەێد.