سەرۆکایەتی هەرێم کوردستان و کۆمسیۆن: هویچ ریکرییگ لە نوای ئەنجامدان هەڵوژاردن لە کوردستان نییە
ئەوەیش لە کۆنگرەیگ رووژنامەوانی هاوبەش هات ئەرا دڵشاد شەهاب قسەکەر سەرۆکایەتی هەرێم و عومەر ئەحمەد سەرۆک کۆمسیۆن باڵای سەروەخوەی هات، دویای دیداریگ ئەرا هەردوگیان لە هەولێر.
دڵشاد شەهاب لەناو کۆنگرەگە وت: خوازیمن هەڵوژاردن دەسپاک و سەرکەفتی بوود، و هویچ ریکرییگ لەنوای ئەنجامدانی نییە.
وتیش: سەرۆکایەتی هەرێم کوردستان وە گرنگی نووڕێدە جیوەجیکردن هەڵوژاردن لە مەوقەی دیاریکریای خوەی.
لەباوەت چەوپیکەفتنی وەرد سەرۆک کۆمسیۆن باڵای سەروەخوەی هەڵوژاردن شەهاب وت: ئامانجمان لەی دیدارە نووەوکردن پاڵپشتیکردن سەرۆکایەتی هەرێم کوردستان و ریکارەیل ئامادەکاری ئەرا هەڵوژاردن بوی.
دیاری کرد کە لە دیدارەگە باس بڕیگ باوەت کریار و وەڵامدان لەبان پرسیارەیل هەڵوژاردن لە جویراجویر لایەیلی، وتیش: ئیمە خوەشاڵیمن و ئومید گەورەیگ وە سەرکەفتن ئی هەڵوژاردنە دیریمن.
قسەکەر سەرۆکایەتی هەرێم کوردستان دووپات کرد کە سەروکایەتی هەرێم تەقەلای نزیکەوکردن نووڕینەیل ناوەین لایەنەیل سیاسی کەێد، و سروشتیە هەڵمەت هەڵوژاردن بوود و دوینیمن کە رکابەری ناوەین حزبەیل سیاسی شیوەیگ لە پیشکەفتن لەلی دیارە.
شەهاب داوا لە حزبەیل سیاسی کرد هەناێ دەسوە هەڵمەت پرۆپاگەندەی هەڵوژاردن کریەێد مقیەتی دیمەن رەنگین هەرێم کوردستان بکەن، و لەی چوارچیوە ماف گشت حزب و کاندیدەیلە پرۆپاگەندە ئەرا خوەیان بکەن، وەگورەی رینمایەیل کۆمسیۆن.
لەلای خوەییش، سەرۆک کۆمسیۆن دووپات کرد کە گشت ئامادەکاریەیل ئەرا جیوەجیکردن هەڵوژاردن لە هەرێم کوردستان تەواو بویە.
ئەحمەد لەناو گۆنگرەگە دووپات کرد کە هویچ ریکرییگ لەنوای هەڵوژاردن لە هەرێم کوردستان لە مەوقەی دیاریکریای خوەی نییە، وتیش؛ چەودیاریکەرەیل ناودەوڵەتی سەرپەرشتی دەنگدان لە بنکەیل هەڵوژاردن لە پارێزگایل هەرێم کوردستان کەن.
وتیش؛ حکومەت هەرێم کوردستان مقیەتی ئاسایش هەڵوژاردن کەێد، و دووپات کرد کە دەنگامەگە لە بیس مانگ تشرین یەکەم وەبی گیچەڵ وەڕیەو چوود.
