سوپای عراق و پێشمەرگە شوونەیل دزەکردن داعش لەناوبەین دیالە وکوردستان بەسن
شەفەق نیوز/ سەرچەوەیگ لە سوپای عراق، ئمڕوو چوارشەممە، راگەیان بەسانن ٩٠% لە شوونەیل دزەکردن و جووڵه‌ی داعش ناوبەین دیالە و هەرێم کوردستان، و لە خود وەختەگە ئاماژەدا وە کەمەوبوین پەلامارە تیرۆریستیەگان وەشیوەی گەورایگ.
سەرچەوەگە ئەرا ئاژانس شەفەق نیوز وت: وڵاوەبوین هێزەیل سوپا لەدەورگرد خانەقین و ئۆپراسیۆنه‌یل وەشوون کەفتن حەشارگەەیل داعش بویە هووکاریگ لە کەمەوبوین پەلامارە تیرۆرستیەگان دژوە ئاوایەیل و کەرتە ئەمنیەگان لە دەورگرد قەزاگە، وهەمیش دووپاتکرد ک وڵاوەبوین پێشمەرگە لە سنور دیالە-کوردستان لە سنور قەزای کەلار وپاڵپشتی کەرت و خاڵە ئەمنیەگانی لەو ناوچەیلە ٩٠% لە شوونەیل دزەکردن داعش ناوبەین دیالە و کوردستان بەساد.
سەرچەوەگە ک خوەی ئەفسەریگە لە سوپا ئاماژەکرد ک رێکەفتنە ئەمنیەگان و هەماهەنگیگەی ناوبەین سوپا و پێشمەرگە لە سنور دیالە و کوردستان پاڵپشتی ئاسایش و ئارامی لە ئاوایەگان کەێد ک بوینە نەیچیریگ ئەرا پەلامەرەیل داعش لە ماوەی دووساڵ گوزەیشتە، ک دەیان قوربانی لەناو مەدەنی و ئەندامە ئەمنیەگان هیشتە جی.
سەرچەوەگە ئاشکرای گرنگترین ستراتیژیەگان کرد ناوبەین پێشمەرگە و سوپای عراق، ک کەفێدە بان لەناوبردن شانە خەفتگەگان و چەکاننیان لە ئاوایەگان وەگەرد وەشوون کەفتن داواکریاگەیل لە ئەندامەیل داعش لەبان بنەمای زانیاری هاوبەش لەلای هەردوگلاگە.
