سه‌ركرده‌ى كورد و سه‌رۆك هه‌رێم كوردستان ياد بۆمباران ئۆردوگای زێوه ئه‌كه‌ن
شه‌فه‌ق نيوز/ مه‌سعود بارزانى سه‌ركرده‌ى كورد، په‌ياميگ ئاراسته كرد وه بوونه‌ى 35ه‌مين سالياد بۆمبارانكردن ئۆردوگاى زێوه وه ته‌ياره‌يل جه‌نگى له‌لايه‌ن رژيم وه‌رين و كه‌فتنه‌وه‌ى شماره‌يگ قوربانى له ژن و مناڵ، جه‌خت له‌وه‌يش كرد ئى پرووسه ئاماژه‌ى ئاشكرايگه ئه‌را دڕنده‌يى ئه‌و رژيم و مه‌زڵوميه‌ت ملله‌ت كوردستان.
له‌و په‌يامه ك ئاژانس شه‌فه‌ق نيوز ئاگادارى بوێ، هاتگه: 35 ساڵ له‌بان بۆمبارانكردن ئۆردوگاى زێوه وه‌سه‌رچێ، له 9 حزه‌يران ساڵ 1985 رژيم به‌عس له‌ڕێ وه‌كارهاوردن 8 ته‌ياره‌ى سيخۆ ده‌سكرده بۆمبارانكردن ئۆردوگاى په‌نابه‌ره‌يل زێوه وه‌شيوه‌يگ دڕندانه و بويه هووكار شه‌هيدبوين شماره‌ى فريه‌يگ له ژن و مناڵ بيتاوان.
بارزانى باس له‌وه كرد كاره‌سات زێوه يه‌كيگه له لاپه‌ڕه‌يل سيه‌ى ده‌وڵه‌ت عراقى ك هويچ وه‌ختيگ له‌هويره‌و ناچێد. ڕژێم به‌عس وه ئه‌نفال و گرتن و ئاواره‌كردن خه‌ڵك كوردستان نه‌و‌سيا و تاوان دڕندانه‌ی زێوه‌يش ئه‌نجام دا. هه‌ر كه‌سيك ناڵه‌ی زه‌خمداره‌يل و جه‌سه‌ی له‌تله‌تكرياێ و سزياێ شه‌هیده‌يل زێوه بوينياتا، فريه ئاشكرايى دڕنده‌یی ڕژێم ئه‌و وه‌خته‌ى عراق و مه‌زڵوومییه‌ت ملله‌ت كوردستان ئه‌راى ده‌ركه‌فتياد. له هه‌مان وه‌ختيش، خۆڕاگری و قاره‌مانێتیی په‌نابه‌ره‌يل زێوه و دایگه ئامینا و سه‌دان نموونه‌ی تر ملله‌ت كورد، په‌یام ئاشكرايگ بوێ ئه‌را گشتلايگ كه دوشمن چه‌نيگ دڵڕه‌ق و پڕچه‌كیش بدێ ناتوانێد ڕى له ئیراده‌ی ئازادیخوازیی ملله‌ت كورد بگرێد و سه‌رشۆڕ و شكياێ مينێده‌وه.
بارزانى هه‌ميش وت: له‌و یاد دڵته‌زنه سڵام ئه‌را گیان شه‌هیده‌يل سه‌ربه‌رز زێوه و گشت شه‌هیده‌يل ڕيگه‌ی ئازادی و سڵام ئه‌را گیانفیدایی و ئازایه‌تیی ملله‌ت كوردستان.
لاى خوه‌ييشه‌و، نێچيروان بارزانى سه‌رۆك هه‌رێم كوردستان، له ماڵپه‌ڕ كۆمه‌ڵايه‌تى تويته‌ر په‌ياميگ بڵاوكرد ك ئاژانش شه‌فه‌ق نيوز ئاگادار بوێ و له‌تى ياد شه‌هيده‌يل ئۆردوگاى زێوه كرد و سڵام له گيان پاك ئه‌و شه‌هيده‌يله كرد ك وه ه‌ياره‌يل به‌عس له 9/6/1985 كريانه ئامانج و شماره‌يگ له ژن و مناڵ له‌تى بوينه قوربانى.
