سلێمانى هاتوچوو وه‌گشت شيوه‌يگ قه‌يه‌غه كرد
شه‌فه‌ق نيوز/ ئداره‌ى پاريزگاى سلێمانى، جه‌خت له تونه‌وكردن بڕيار قه‌يه‌غه‌ى هاتوچوو كرد و بڕياردا گشت جموجويليگ وه‌ته‌واوى له‌ماوه‌ى 48 سه‌عات قه‌يه‌غه‌س
قايمقاميه‌ت سلێمانى له به‌ياننامه‌يگ وت: له‌باره‌ى هسيارى بارودوخ و بڵاوبوينه‌وه‌ى ڤايرۆس كۆرۆناى تازه له هه‌رێم كوردستان، بڕيار تونه‌وكردن رێ وشوونه‌يل قه‌يه‌غه‌ى هاتوچوو درياگه و رێ وه كه‌س نادريه‌ێد وه سه‌ياره يا وه پياده هاتوچوو بكاو رينماييش درياسه هيزه‌يل ئه‌منى ئه‌را گرتن ئه‌و كه‌سه‌يله ك پابه‌ند نيه‌ون وه‌و رێ وشوونه‌يله.
به‌ياننامه‌گه يه‌يش ده‌رخست ك وه‌بوونه‌ى مه‌ترسى بڵاوبوينه‌وه‌ى ڤايرۆس كۆرۆنا له‌ماوه‌ى 48 سه‌عات رێ وه مه‌ردم نادريه‌ێد وه‌هويچ شيوه‌يگ هاتوچوو بكه‌ن، يه‌يش دوياى بريار وه‌زاره‌ت ناوخوه‌يى له حكومه‌ت هه‌رێم كوردستان له‌باره‌ى تونه‌وكردن رێ وشوونه‌يل قه‌يه‌غه‌ى هاتوچوو له‌ماوه‌ى 48 سه‌عات ئاينده ئه‌را ريگرى له بڵاوبوينه‌وه‌ى په‌تاى كۆرۆنا.
