رووژ شاخەوانی لە کوردستان.. وێنە
شەفەق نیوز/ لەبان کۊیەی کۆڕەک، سەدان لە شاخەوانەیل هەرێم کوردستان، ئمڕوو یەکشەممە، وەبان چگن و ریکردن وەرەو سەرچەوەیل ئاوەگە لە دووڵ میکەر لە قەزای رەواندز لە هەولێر ئاهەنگ کردن.
کاوە خدر عەبدولڵا، لە یەکێتی شاخەوانەیل کوردستان، ئەرا ئاژانس شەفەق نیوز ئۊشێد: گردەوبۊنەگە لەبان کۊیەی کۆڕەک بۊی، ئیجا وەرەو دووڵ میکەر رۊی کردن تا رەسینە چەوەیل ئاوەگە، ک وەرجە ٣٠٠ ساڵ لەلایەن شازادە محمد سۆران وە جوو ئاویگ ئاوەگە ئەرا خەڵک شارەگە رەسانیە.
عەبدوڵلا وتیش: ئاهەنگ ئی رووژە لە کەشوهەوای ئاهەنگ لەلایەن دووسەیل شاخەوانی کریا ک خوەشیان لە وەرزش ریکردن تیەێد لە هەردوگ رەگەزەگە، و وەگەرد چڕین گورانی کوردی لە مەوقەی چگنیان وەرەو بان کۊیەێلە، وەگەرد خوەشگوزەرانی وە کەشوهەوای خوەش سرووشتەگەی کۊیەی حەسارۆات وەفرپووش.
کۊیەی کۆڕەک ٢١٢٧ مەتر هابان ئاست دەریا، و ١٥٠٠ مەتر ئەوبان زەۊی، و وەفر فرەیگ لەبانی وارێد، و ئەرا گشت بازیەیل زمسانی گونجیاگە.
لۊتکەی کۊیەگە بۊیەسە قیبلەی گەشتیارەیل زمسان، ک خەڵکەگە لە هەرێم کوردستان و عراق و بیگانەیلیش رۊی وەپی کەن.
