دەسکەفتیگ مێژوویی.. یەکەم کورد رەسێدە بان بەرزترین لویتکە کویە لە جەهان (وینە)
2024-05-23T11:28:39+00:00
شەفەق نیوز/ بازرگان کورد دانشتگ سویسرا، دادڤان یوسف، سەرکەفتی بوی لە وەدەسهاورد "دەسکەفتیگ مێژوویی" وە رەسنی ئەرا لوتکە کویەی ئەڤرێست وە یەش بویە یەکەمین کورد بچێدە بان بەرزترین لوتکە کویە لە جەهان.
مەحفوز محەمەد کە یەکیگە لە نزیکەیل دادڤان یوسف وە ئاژانس شەفەق نیوز وت، "ئێ گەشتە 63 رووژ کیشا لەو ماوە دادڤان 400 هەزار دۆلار لە حساو تایوەتی خوەی خەرج کردیە ئەرا وەجی رەسانا خەونەگەی".
وتیش"دادڤان یەکەم کەسە لە هەرێم کوردستان و عراق بڕەسێدە لوتکە کویەی ئەڤرێست".
دیاریکرد، دادڤان خەڵک ئاوای "زریزە"س سەر وە قەزای باتیفا لە ئیدارەی سەروەخوەی زاخۆ لە پارێزگای دهۆک، ئیرنگە لە سویسرا زندگی کەێد، ئێ دەسکەفتە تەنیا ئەرا دادڤان مایەی شانازی نییە، بەڵکم ئەرا هەرێم کوردستانیشە کە وەهێزەی ئیرادە و پێداگری کردن لە سەختیەیل دەرخێد.
