دوێەتەیل ئەیزیدی وە مۆسیقا ژیانیان نووەو کەن
شەفەق نیوز/ لە کامپ خانکی لە پارێزگای دهۆک، دوێەتەیلیگ ئەیزیدی راهێنان لەبان چڕین گورانیە جەماوەریەکان کردن، دویای ئەوە ک گورانی لە سەردەم داعش حرام بوی.
ئەندامەیل گرووپ «ئاشتی» ک دوێەتیگ ئەیزیدی وەناو رەنا سڵیمان (٢٢ ساڵان) دامەزرانەی، خوازێد وەڕی گورانیە جەماوەریەکان مقەیەتی کەلتووریان بکەێد، و خۆڕاگرییان بچەسپنێد.
لەو کامپە ک نزیکەی ١٤ هەزار ژن و پیاو ومناڵ ئەیزیدی هانە ناوی، دوێەتەیل لەوەخت شەوەکیان و لەمەوقەی دەرەو گورانی چڕن.
و فرە لە ژنەیل ئی کۆڕاڵە دەسوەسەر داعش بوین، و فرە لە تاکەیل خیزانەیلیان لەدەس دان، و لەڕی مۆسیقاگە چارەسەری ئەرا ئەو ئەندانەمەیلە پێشکەش کەن ک بوینە قوربانی لە دەسدریژی داعش.
مامو عوسمان، ک مۆسیقا لە زانکۆی دهۆک خوەنێد، وت: کەلتوور ئەیزیدی هالە ژیر هەڕەشە، چوونکە فرە لەلی تۆمار نەکریاگە، و پەنابردن فرە لە خیزانەیل وەرەو دەیشت ناوچەیل خوەیان هەڕەشەی ئی کەلتوورە دەێد.
و هەمیش ئووشێد: ئەیزدیەکان لەو کۆمەڵاگایل زیاتر پەیوەندی وە زەوی خوەیان دیرن، و چوونکە لە زەوی وخاک خوەیان دویرەو کەفن، ئەووسا شناسنامەی ئاینی خوەیان گوم کەن.
رێکخراو AMAR ک سپۆنسەر گرووپەگە وە تۆمارکردن بەشیگ لە گورانیە جەماوەریەکان کەێد، و تۆمارەکان داگە نووسینگەی بودلیان لە زانکۆی ئۆکسفۆرد.
ڤیان دەرویش، خانمە ئەندام ئەیزیدی لە پەرلەمان عراق ئووشێد: لە سەردەم داعش گردەوبوین و ئاهەنگەیل بیدەنگ بوین.
باوجی ئیسە، تەقەلا دەن ژیان سرووشتی خوەیان گوزران بکەن، نەک تەنیا جوور قوربانیەیلیگ، ئی هەستە وە دووسی ژیان و مۆسیقا و ئاهەنگ سویرەیل ودڵخوەشی وەژیانیگ سرووشتی لەبان گشت نەهامەتیەیل دیرن.
غەزاڵ داود حسێن دوێەت ئەیزیدی (٢١ ساڵان) ئووشێد: دوێەتەیل تیمەگە جوور کاریگ وەرخودان وەگەرد گورانی رەفتار کەن، و ئووشێد: ئیمە هایمنە ئێرا تا پەیامیگ ئاڕاستەی داعش بکەیمن؛ ک ئیمە قەت نێشکیمن.
