دریژەوکردن رێککەفتن هەناردەکردن ئەرا هەرێم کوردستان تا 2027 بەرهەمهاوردن ئەرا کێڵگەی "شێخان" وە 40 هەزار بەرمیل لە رووژیگ گلەو دەێد
شەفەق نیوز - وەدۊاچگن
کۆمپانیای "گۆلف کیستۆن پترۆلیۆم" بەریتانی کارکەر لە هەرێم کوردستان، ئمڕوو سێشەممە، خەوەر دا لە راپۆرتەیل دارایی و کارپیکردن خوەی ئەرا نیمەی یەکەم لە ساڵ 2026، و دووپات لە دەسوەپیکردن کارەیلی کرد دۊای وساننی وە شیوەیگ وەختانە لە تەمموز/ یۆلیۆی گوزەشتە، وەگەرد بەشەوکردن قازانجەیل وە بڕ 10 ملیۆن دۆلار لەبان پشکدارەیلی.
و کۆمپانیاگە لە راپۆرتیگ ئەڕای دیاری کرد، کە دریژەوکردن رێککەفتن سێانی وەختانە ناوەین کۆمپانیا بیگانەیل و حکومەت فیدراڵی و حکومەت هەرێم کوردستان ئەرا شەش مانگ ترەک دریژەو بوود تا کووتایی کانوون دۊەم/ یەنایەر 2027، چۊ ئامادەکارییگ ئەرا رەسین وە رێککەفتنیگ مەودا دریژ کە پشت وە نرخەیل جەهانی بەسێد، و وباس دەسوەپیکرن کارەیل مەیدانی لە کێڵگەی نەفتی "شێخان" لە پارێزگای دهۆک.
سەرۆک جیوەجیکار کۆمپانیاگە، جۆن هاریس، وت کە "ئەنجامداین کارکردن و دارایی نەرمییگ فرە لە نوای ئەو شیویایەیلە نیشان دا کە ناوچەگە وەخوەی دی"، و دیاری کرد کە "لە سای دریژەوکردن رێککەفتن هەناردەکردن، بەرهەمهاوردن و هەناردەکردن دەس وەپی کردەو و ریژەیان پلەوەپلە زیای بوود ئەرا رەسین وە ئاستەیل وەرین".
وەپای راپۆرتەگە، مامناوەن بەرهەمهاوردن رووژانەی کۆمپانیاگە لە نیمەی یەکەم لە ئمساڵ رەسیە نزیکەی 14,600 بەرمیل، وە توومارکردن کەمەوبۊنیگ لە 44,100 بەرمیل ئەرا خود ماوەگە لە ساڵ گوزەشتە، وە مدوو وسانن وریایانەی کارەیل ناوەین 28 شوبات/ فێبرایەر و 23 حوزەیران/ یۆنیۆ گوزەشتە لەوەر رەوشە ئەمنییەیل، وەرجە ئەوەگ بەرهەمهاوردن لە 16 ئاب/ ئۆگۆست ئیسە دەس وەپی بکەێدەو تا ریژەی ئیسەی لە 40 هەزار بەرمیل لە رووژیگ نزیکەو بوود.
