دانوسەنین كوردستانی توركی ئەرا بەسانن عراق و ئەوروپا وە کڕ ئاسنین
شەفەق نیوز/ مەسروور بارزانی سەرۆک حکومەت هەرێم کوردستان، ئمڕوو چوارشەممە، راگەیان کە گردەوبوینیگ وەرد محمد شيمشك، وەزیر دارایی تورکیا ئەنجام داگە، لە پەراویز بەشداریکردنی لە دویەم رووژ لویتکەی جیهانی حکومەتەیل لە دوبەی.
لە دیدارەگە، وەگورەی بەیاننامەیگ لە نویسنگەی بارزانی کە رەسیە ئاژانس شەفەق نیوز؛ باس شیوەی پەیوەندییەیل ناوەین هەرێم کوردستان و کۆمار تورکیا کریا، وەتایبەت لە کەرتەیل بازرگانی و ئابووری و بەرهەمهاوردن، وە شیوەیگ سوودی باێدە بان هەردوگ لا.
هەمیش هەردوگلا باس تەقەلایل چارەکردن باوەتەیل گیرهاتگ ناوەین هەرێم کوردستان و حکومەت فیدڕاڵی کریا، وەگەرد ریکارەیل دووارە هەناردەکردن نەفت هەرێم کوردستان وە نزیکترین وەخت.
لەو دانوسەنینە باس پڕۆژەی "ری گەشەپیدان" ستراتیژی کریا، کە بەسانن دەوڵەتەیل کەنداو و عراق و هەرێم کوردستان وەرد تورکیا، وە کڕ ئاسنین کەێدە ئامانج.
هەردوگ لایەن رێککەفتن لەبان گرنگی مسۆگەرکردن بەشدارییگ کارا ئەرا هەرێم کوردستان لەی پڕۆژەی گرنگە.
مەسروور بارزانی سەرۆک حکومەت هەرێم کوردستان هەمیش لە شار دوبەی، چەوی کەفتە محمد بن زاید ئال نهەیان سەرۆک دەوڵەت ئیمارات.
لەو دیدارە کە قوباد تاڵەبانی جیگر سەرۆک حکومەت هەرێم کوردستان ئامادەی بوی، باس دویاترین نووەوبویەل گشتی لە عراق و ناوچەگە کریا.
هەردوگ لایەن دووپات لەبان بتەوکردن هەماهەنگی و هاوکاری دووانی کردن، و گرنگی قایمکردن بنەمایل برادەری ناوەین هەرێم کوردستان و ئیمارات لە جویراجویر چینەیل.
